នាយករដ្ឋមន្ត្រីស្តីទីរបស់ប្រទេសថៃ នៅថ្ងៃសុក្រ (ទី២៩ ខែសីហា) នេះ បានប្រាប់ឲ្យដឹងថា សម្ព័ន្ធភាពដែលកំពុងកាន់អំណាចរបស់ប្រទេសថៃ នៅតែរួមគ្នា ហើយគណបក្ស Pheu Thai (ភឿថៃ) មានទំនុកចិត្តថា ខ្លួននឹងបង្កើតបានរដ្ឋាភិបាលមួយ ហើយនៅតែជាស្នូលនៃក្រុមចម្រុះ។

ការលើកឡើងនេះកើតមាន បន្ទាប់ពីតុលាការធម្មនុញ្ញរបស់ប្រទេសថៃ បានសម្រេចទម្លាក់លោកស្រី Paetongtarn Shinawatra ពីតំណែងនាយករដ្ឋមន្ត្រីជាផ្លូវការ នៅថ្ងៃសុក្រនេះ ពីបទបំពានក្រមសីលធម៌។

ដោយបង្ហាញខ្លួននៅឯសន្និសីទសារព័ត៌មានមួយជាមួយដៃគូចម្រុះសំខាន់ៗជាច្រើន នាយករដ្ឋមន្ត្រីស្តីទី លោក Phumtham Wechayachai ដែលជាសមាជិករបស់គណបក្សភឿថៃ បាននិយាយថា បេក្ខភាពនាយករដ្ឋមន្ត្រី នឹងត្រូវបានតែងតាំងឲ្យបានឆាប់តាមដែលអាចធ្វើទៅបាន។

តែយ៉ាងណាក្ដី លោកមិនបានលើកពីឈ្មោះបេក្ខជនណាម្នាក់ឡើយ ប៉ុន្តែមន្ត្រីគណបក្សម្នាក់ នៅមុននេះ បានបង្ហើបថា គណបក្សភឿថៃ នឹងជ្រើសរើសលោក Chaikasem Nitisiri វ័យ ៧៧ឆ្នាំ ដែលជាអតីតអគ្គមេធាវី៕