តួលេខពីការិយាល័យការងារ បានបង្ហាញនៅថ្ងៃសុក្រ (ទី២៩ ខែសីហា) នេះថា ចំនួនអ្នកអត់ការងារធ្វើ នៅក្នុងប្រទេសអាល្លឺម៉ង់ បានមានលើស ៣លាននាក់ជាលើកដំបូង ក្នុងរយៈពេល ១ទសវត្សន៍ ដោយធ្វើឲ្យមានហានិភ័យកាន់តែខ្ពស់ដល់ផែនការវិនិយោគដ៏ធំរបស់រដ្ឋាភិបាល ក្នុងការសម្រេចបានលទ្ធផលឆាប់រហ័ស។

មនុស្សសរុបចំនួន ៣,០២លាននាក់ បានអត់ការងារធ្វើនៅក្នុងខែសីហា ជាលក្ខខណ្ឌដែលមិនមានការកែតម្រូវតាមរដូវកាល ដោយកើនឡើង ៤៦.០០០នាក់ ក្នុងចំណោមចំនួនមនុស្សដែលគ្មានការងារនៅខែមុននោះ។

ប្រធានការិយាល័យការងារ លោក Andrea Nahles បានលើកឡើងថា៖ «ទីផ្សារការងារនៅតែរងប៉ះពាល់ដោយសារការធ្លាក់ចុះនៃសេដ្ឋកិច្ចក្នុងប៉ុន្មានឆ្នាំថ្មីៗនេះ»។

អាល្លឺម៉ង់កំពុងជួបការលំបាក ដោយសារមានសេដ្ឋកិច្ចទន់ខ្សោយជាបន្តបន្ទាប់ ហើយការដំឡើងពន្ធនាំចូលរបស់ប្រធានាធិបតីអាមេរិក លោក Donald Trump អាចនាំទៅដល់ការមិនមានកំណើន ៣ឆ្នាំជាប់គ្នាជាលើកដំបូង។

អត្រាគ្មានការងារធ្វើដែលត្រូវបានកែសម្រួលតាមរដូវកាល នៅតែមានកម្រិតដដែល ៦,៣ភាគរយ ស្របតាមការព្យាករបស់អ្នកវិភាគនៅក្នុងការស្ទង់មតិរបស់សារព័ត៌មាន Reuters។ ប៉ុន្តែតម្រូវការកម្លាំងពលកម្មមានកម្រិតយឺត។ ចំនួនអ្នកមានការងារធ្វើ ក្នុងខែសីហា គឺ ៦៣១.០០០នាក់ ដែលតិចជាងឆ្នាំមុនចំនួន ៦៨.០០០នាក់៕