ការតវ៉ាបានផ្ទុះឡើងនៅក្នុងទីក្រុងជាច្រើន ហើយភាពតានតឹងបានកើនឡើងនៅទូទាំងប្រទេសឥណ្ឌូនេស៊ី នាថ្ងៃសុក្រ (ទី២៩ ខែសីហា) នេះ ពោលគឺមួយថ្ងៃបន្ទាប់ពីបើតាមការចោទប្រកាន់ អ្នកដឹកជញ្ជូនម្នាក់ត្រូវបានបុកដោយរថពាសដែករបស់នគរបាល អំឡុងពេលមានការប៉ះទង្គិចគ្នា រវាងនគរបាលកុបកម្ម និងនិស្សិតដែលតវ៉ាប្រឆាំងនឹងប្រាក់ឧបត្ថម្ភរបស់សមាជិកសភា។

ក្រុមអ្នកតវ៉ាបានដើរដង្ហែទៅកាន់ទីស្នាក់ការកណ្តាលនៃកងពលតូចនគរចល័ត ក្នុងរដ្ឋធានីហ្សាការតា នៅថ្ងៃសុក្រនេះ ហើយអ្នកខ្លះបានព្យាយាមសម្រុកចូលបរិវេណនោះ។ នគរបាលបានប្រើការណុងបាញ់ទឹក និងបាញ់ឧស្ម័នបង្ហូរទឹកភ្នែកជាច្រើនដង ដើម្បីបំបែកក្រុមបាតុករដែលគប់ដប ដុំថ្ម និងអណ្ដាតភ្លើងទៅពួកគេ។

ក្រុមកុបកម្មមួយក្រុមបានដុតអគារកម្ពស់ ៥ជាន់ នៅជិតបរិវេណនគរបាល ក្នុងតំបន់ Kwitang នៅកណ្តាលទីក្រុងហ្សាការតា ដែលបណ្តាលឲ្យមនុស្សជាច្រើនជាប់នៅខាងក្នុងនោះ។ សិស្សខ្លះបានផ្អាកការតវ៉ារបស់ខ្លួន ដើម្បីជួយទាហាន និងអ្នកស្រុកសង្គ្រោះអ្នកដែលជាប់នៅខាងក្នុងនោះ។ បាតុករផ្សេងទៀតបានបំផ្លាញផ្លាកសញ្ញាចរាចរណ៍ និងហេដ្ឋារចនាសម្ព័ន្ធផ្សេងទៀត ដែលបណ្តាលឲ្យមានកកស្ទះចរាចរណ៍ នៅក្នុងតំបន់នោះ។

ការប៉ះទង្គិចគ្នា រវាងបាតុករគប់ដុំថ្ម និងនគរបាលកុបកម្ម ក៏បានផ្ទុះឡើងផងដែរ នៅក្នុងទីក្រុងផ្សេងទៀតទូទាំងប្រទេស រួមមាន Surabaya, Solo, Yogyakarta, Medan, Makassar, Manado, Bandung និង Manokwari នៅចុងភាគខាងកើតតំបន់ Papua។

ភាពចលាចលនេះបានកើតឡើងបន្ទាប់ពីវីដេអូមួយនៅលើបណ្ដាញសង្គម ដែលហាក់ដូចជាបង្ហាញឲ្យឃើញពីការស្លាប់របស់អ្នករត់ម៉ូតូឌុប ក្នុងអំឡុងពេលមានការប៉ះទង្គិចកាលពីថ្ងៃព្រហស្បតិ៍ បានធ្វើមានការតក់ស្លុតទូទាំងប្រទេស និងបានជំរុញឲ្យមានការតវ៉ាប្រឆាំងនឹងកងកម្លាំងសន្តិសុខ៕