អ្នកការទូតជាន់ខ្ពស់របស់ប្រទេសទួរគី បានប្រាប់ឲ្យដឹងថា ប្រទេសរុស្ស៊ីកំពុងទាមទារឲ្យអ៊ុយក្រែនបោះបង់តំបន់ Donbas ភាគខាងកើតរបស់ខ្លួនទាំងអស់ ប៉ុន្តែនឹងមានឆន្ទៈក្នុងការបញ្ចប់ជម្លោះ នៅភាគខាងត្បូងនៃប្រទេសនេះ នៅតាមតំបន់ជួរមុខនាពេលបច្ចុប្បន្ន។

ប្រទេសរុស្ស៊ីគ្រប់គ្រងប្រហែល ១ភាគ៥នៃដែនដីរបស់អ៊ុយក្រែន ហើយបានអះអាងថា បានបញ្ចូលជាដែនដីឧបសម្ព័ន្ធនូវតំបន់ចំនួន ៥ នៃប្រទេសនេះ ដែលមាន Donetsk, Lugansk, Kherson និង Zaporizhzhia រួមជាមួយនឹងតំបន់គ្រីម៉ា ដែលទីក្រុងមូស្គូបានរឹបអូសក្នុងឆ្នាំ២០១៤។

នៅឯកិច្ចចរចាសន្តិភាព ក្នុងទីក្រុងអ៊ីស្តង់ប៊ុល នាឆ្នាំនេះ ក្រុមអ្នកចរចារបស់រុស្ស៊ី បានទាមទារឲ្យអ៊ុយក្រែនដកចេញពីតំបន់ទាំងនោះទាំងស្រុង ជាលក្ខខណ្ឌមួយដើម្បីបញ្ចប់ជម្លោះដែលបានចាប់ផ្តើមជាមួយនឹងការលុកលុយឈ្លានពានរបស់រុស្ស៊ី នៅឆ្នាំ២០២២។

ប៉ុន្តែបើតាមរដ្ឋមន្ត្រីការបរទេសទួរគី លោក Hakan Fidan បានឲ្យដឹងថា បន្ទាប់ពីមានជំនួបកំពូល រវាងប្រធានាធិបតីរុស្ស៊ី លោក Vladimir Putin និងប្រធានាធិបតីអាមេរិក លោក Donald Trump ទីក្រុងមូស្គូបានបន្ថយការទាមទាររបស់ខ្លួន។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ TGRT Haber កាលពីថ្ងៃព្រហស្បតិ៍ (ទី២៩ ខែសីហា) លោក Fidan បាននិយាយថា៖ «ឥឡូវនេះពួកគេបានបោះបង់ចោលនូវតម្រូវការនោះ ហើយកំពុងបន្តឈរនៅតាមតំបន់ជួរមុខបច្ចុប្បន្ន លើកលែងតែតំបន់មួយ។ បច្ចុប្បន្ន មានកិច្ចព្រមព្រៀងបឋមទាក់ទងនឹងការប្រគល់មកវិញ ២៥-៣០ភាគរយនៃតំបន់ Donetsk និងការបន្តឈរនៅតំបន់ជួរមុខ នៅ Zaporizhzhia និង Kherson»។

យ៉ាងណាក្ដី គេមិនទាន់ច្បាស់ទេថា តើកិច្ចព្រមព្រៀងនោះ បានឈានដល់ រវាងនរណា និងនរណា។ អ៊ុយក្រែនបានបដិសេធម្តងហើយម្តងទៀតនូវការធ្វើសម្បទានដែនដី តែលោកប្រធានាធិបតី Volodymyr Zelenskyy ធ្លាប់បាននិយាយថា ទីក្រុងគីវ ចាំបាច់ត្រូវធានាឲ្យមានការប្រគល់ត្រលប់មកវិញនូវដែនដី តាមរយៈការទូត មិនមែនតាមរយៈសមរភូមិនោះឡើយ»៕