យោធារបស់អ៊ីស្រាអែល បានបង្កើនប្រតិបត្តិការនៅជុំវិញទីក្រុងហ្កាហ្សាកាលពីថ្ងៃសុក្រ ដោយបញ្ចប់ការផ្អាកបណ្តោះអាសន្នដែលបានអនុញ្ញាតឱ្យមានការដឹកជញ្ជូនជំនួយមនុស្សធម៌ចូល និងបានប្រកាសពីការរកឃើញសាកសពលោក Ilan Weiss ជាចំណាប់ខ្មាំងដែលក្រុមហាម៉ាស់ចាប់ខ្លួន។

យោធាបាននិយាយថា ការផ្អាកជាយុទ្ធសាស្ត្រ «នឹងមិនអនុវត្តនៅតំបន់នៅទីក្រុងហ្កាហ្សា ដែលបង្កើតជាតំបន់ប្រយុទ្ធដ៏គ្រោះថ្នាក់នោះទេ» ខណៈខ្លួនបានបន្តផែនការរុលទៅមុខដើម្បីគ្រប់គ្រងពេញលេញនៃតំបន់ហ៊ុមព័ទ្ធមួយនេះ និងបំផ្លាញក្រុមហាម៉ាស បន្ទាប់ពីសង្គ្រាមរយៈពេលជិតពីរឆ្នាំ។

អ្នកនាំពាក្យយោធាអ៊ីស្រាអែល លោក Avichay Adraee បាននិយាយថា «កងទ័ពកំពុងធ្វើប្រតិបត្តិការយ៉ាងខ្លាំងក្លានៅជាយក្រុងហា្កហ្សា ហើយនឹងធ្វើឱ្យការវាយប្រហាររបស់យើងកាន់តែចូលជ្រៅ»។

អាជ្ញាធរសុខាភិបាលតំបន់ហ្កាហ្សាបាននិយាយថា មនុស្ស៥នាក់ រួមទាំងកុមារពីរនាក់បានស្លាប់ដោយសារកង្វះអាហារូបត្ថម្ភក្នុងរយៈពេល២៤ម៉ោងកន្លងទៅនេះ ដែលនាំឱ្យចំនួនអ្នកស្លាប់ដោយសារភាពអត់ឃ្លានកើនឡើងដល់៣២២នាក់ចាប់តាំងពីសង្គ្រាមចាប់ផ្តើម។

អាជ្ញាធរបាននិយាយបន្ថែមថា ការវាយប្រហាររបស់អ៊ីស្រាអែលនៅទូទាំងដែនដីនេះបានសម្លាប់មនុស្ស ៤៨នាក់កាលពីថ្ងៃសុក្រ។ វីដេអូរបស់សារព័ត៌មាន Reuters បានបង្ហាញសាកសពដាក់តម្រៀបជាជួរនៅខាងក្រៅមន្ទីរពេទ្យ al-Shifa នៅទីក្រុងហ្កហ្សា។