នៅមុនដំណើរទស្សនកិច្ចទៅកាន់ប្រទេសចិន ប្រធានាធិបតីរុស្ស៊ី លោក Vladimir Putin បានរិះគន់ដល់ការដាក់ទណ្ឌកម្មរបស់លោកខាងលិច ខណៈដែលសេដ្ឋកិច្ចនៃប្រទេសរបស់លោក បានធ្លាក់ទៅកៀកនឹងឱនភាព ដែលរងគ្រោះដោយសារការទប់ស្កាត់ពាណិជ្ជកម្ម និងការចំណាយលើសង្គ្រាមរបស់លោក នៅអ៊ុយក្រែន។

នៅក្នុងបទសម្ភាសន៍ជាមួយទីភ្នាក់ងារសារព័ត៌មានចិន Xinhua ដែលបានចេញផ្សាយនៅថ្ងៃសៅរ៍ (ទី៣០ ខែសីហា) លោក Putin បាននិយាយថា រុស្ស៊ី និងចិន បានរួមគ្នាប្រឆាំងនឹងការដាក់ទណ្ឌកម្ម «រើសអើង» នៅក្នុងពាណិជ្ជកម្មពិភពលោក។

លោកនឹងមានវត្តមាននៅក្នុងប្រទេសចិន ដែលជាដៃគូពាណិជ្ជកម្មដ៏ធំបំផុតរបស់រុស្ស៊ី ចាប់ពីថ្ងៃទី៣១ ខែសីហា ដល់ថ្ងៃទី៣ ខែកញ្ញា ក្នុងដំណើរទស្សនកិច្ចរយៈពេល ៤ថ្ងៃដែលវិមានក្រឹមឡាំងបានចាត់ទុកថា ជាអ្វី «មិនធ្លាប់មានពីមុនមក»។

មេដឹកនាំរុស្ស៊ីនឹងចូលរួមកិច្ចប្រជុំកំពូលអង្គការសហប្រតិបត្តិការសៀងហៃ (SCO) រយៈពេល ២ថ្ងៃ នៅទីក្រុងកំពង់ផែ Tianjin ភាគខាងជើងប្រទេសចិន។ SCO ដែលផ្តោតលើសន្តិសុខបង្កើតឡើងដោយក្រុមនៃប្រជាជាតិអឺរ៉ុប-អាស៊ីក្នុងឆ្នាំ២០០១ បានពង្រីកសមាជិកអចិន្ត្រៃយ៍ដល់ចំនួន ១០ប្រទេស ដែលឥឡូវនេះ រួមមានទាំងអ៊ីរ៉ង់ និងឥណ្ឌាផងដែរ។

បន្ទាប់មក លោក Putin នឹងធ្វើដំណើរទៅកាន់ទីក្រុងប៉េកាំង ដើម្បីជួបពិភាក្សាជាមួយប្រធានាធិបតីចិន លោក Xi Jinping ហើយនិងចូលរួមពិធីព្យុហយាត្រាយោធាដ៏ធំ នៅក្នុងរដ្ឋធានីរបស់ប្រទេសចិន ដើម្បីរំលឹកដល់ការបញ្ចប់សង្គ្រាមលោកលើកទី២ បន្ទាប់ពីមានការចុះចាញ់ជាផ្លូវការរបស់ជប៉ុន។

រុស្ស៊ីត្រូវបានដាក់ដោយទណ្ឌកម្មលោកខាងលិចជាច្រើនជុំ បន្ទាប់ពីមានការលុកលុយលើអ៊ុយក្រែន នៅឆ្នាំ២០២២។ ប្រធានាធិបតីអាមេរិក លោក Donald Trump បាននិយាយថា លោកអាចនឹងដាក់ទណ្ឌកម្ម «ដ៏ធ្ងន់» លើរុស្ស៊ី ដោយអាស្រ័យលើថា តើវឌ្ឍនភាពអាចមាន ឬទេ ក្នុងកិច្ចប្រឹងប្រែង ដើម្បីទទួលបានកិច្ចព្រមព្រៀងសន្តិភាព៕