រដ្ឋមន្ត្រីក្រសួងពាណិជ្ជកម្ម លោក Piyush Goyal បានបញ្ជាក់ថា ប្រទេសឥណ្ឌានឹងមិន «ចុះញ៉ម» នោះឡើយ ហើយផ្ទុយទៅវិញ នឹងផ្ដោតលើការស្វែងរកទីផ្សារថ្មី ដោយនេះជាសុន្ទរកថាជាសាធារណៈលើកដំបូងរបស់លោក គិតចាប់តាំងពីទីក្រុងវ៉ាស៊ីនតោន បានដាក់ចេញអត្រាពន្ធដ៏ធ្ងន់ធ្ងរលើទំនិញឥណ្ឌា។

អត្រាពន្ធកម្រិត ៥០ភាគរយលើការនាំចូលឥណ្ឌាជាច្រើនទៅសហរដ្ឋអាមេរិក បានចូលជាធរមាននៅក្នុងសប្តាហ៍នេះ ដែលជាការដាក់ទណ្ឌកម្ម ដោយសារការទិញប្រេងរុស្ស៊ីដ៏ធំរបស់ទីក្រុងញូវដេលី ពោលគឺជាផ្នែកនៃកិច្ចប្រឹងប្រែងរបស់សហរដ្ឋអាមេរិក ដើម្បីដាក់សម្ពាធលើទីក្រុងមូស្គូឲ្យបញ្ចប់សង្រ្គាមរបស់ខ្លួន នៅអ៊ុយក្រែន។

ចាប់តាំងពីវិលត្រលប់ទៅអង្គុយកៅអីសេតវិមានវិញ ប្រធានាធិបតីអាមេរិក លោក Donald Trump បានប្រើប្រាស់ពន្ធគយជាឧបករណ៍នយោបាយយ៉ាងទូលំទូលាយ ដោយវិធានការដំឡើងពន្ធនេះធ្វើឲ្យពាណិជ្ជកម្មពិភពលោករងការរំខានយ៉ាងខ្លាំង។

អំឡុងពេលថ្លែងនៅឯព្រឹត្តិការណ៍ឧស្សាហកម្មសំណង់ ក្នុងទីក្រុងញូវដេលី កាលពីថ្ងៃសុក្រ (ទី២៩ ខែសីហា) លោក Goyal បាននិយាយថា ប្រទេសឥណ្ឌា «ត្រៀមខ្លួនជានិច្ច ប្រសិនបើនរណាម្នាក់ចង់មានកិច្ចព្រមព្រៀងពាណិជ្ជកម្មសេរីជាមួយយើង»។ ប៉ុន្តែលោកបានបន្ថែមថា ប្រទេសឥណ្ឌា «នឹងមិនចុះញ៉ម ឬបង្ហាញពីភាពទន់ខ្សោយឡើយ»។ លោកបានសង្កត់ធ្ងន់ថា៖ «យើងនឹងបន្តធ្វើដំណើរជាមួយគ្នា និងចាប់យកទីផ្សារថ្មី»។

ការដាក់ចេញពន្ធគយចុងក្រោយបំផុតពីលោក Trump បានធ្វើឲ្យទំនាក់ទំនង រវាងសហរដ្ឋអាមេរិក និងឥណ្ឌា កាន់តែតានតឹង ដោយទីក្រុងញូវដេលី នៅមុននេះ បានរិះគន់ការវិធានការនេះថា ជាការធ្វើ «ដោយអយុត្តិធម៌ មិនត្រឹមត្រូវ និងមិនសមហេតុផល»។ កិច្ចពិភាក្សាពាណិជ្ជកម្ម រវាងប្រទេសទាំង២ បានដួលរលំ ដោយសារមិនមានភាពស្របគ្នា លើបញ្ហាវិស័យកសិកម្ម និងទីផ្សារទឹកដោះគោ៕