ប្រទេសចិនបានលើកឡើងថា ការមានទំនាក់ទំនងកាន់តែប្រសើរឡើងជាមួយឥណ្ឌា គឺជាផលប្រយោជន៍របស់ប្រទេសទាំង២ ហើយភាគីទាំង២ បានចាត់វិធានការនានា ដើម្បីធ្វើឲ្យការប្រាស្រ័យទាក់ទងមានស្ថិរភាព បន្ទាប់ពីមានជំនួបកំពូល រវាងប្រធានាធិបតីចិន លោក Xi Jinping និងនាយករដ្ឋមន្ត្រីឥណ្ឌា លោក Narendra Modi ក្នុងឆ្នាំ២០២៤។

អំឡុងការឆ្លើយតបជាលាយលក្ខណ៍អក្សរ ចំពោះសំណួរជាច្រើន ក្រសួងការបរទេសចិន កាលពីថ្ងៃសុក្រ (ទី២៩ ខែសីហា) បានបញ្ជាក់ថា៖ «ការធ្វើឱ្យប្រសើរឡើងនូវទំនាក់ទំនងចិន-ឥណ្ឌា គឺជាផលប្រយោជន៍រួម សម្រាប់ប្រទេសទាំង២ ក៏ដូចជាលទ្ធផលនៃការប្រឹងប្រែងរួមគ្នារបស់ភាគីទាំង២ ផងដែរ»។

ក្រសួងបានបន្ថែមថា មិនមាន «ការទូតសម្ងាត់» រវាងប្រទេសទាំង២ ឡើយ ពោលគឺមានតែ «ការប្រាស្រ័យទាក់ទង និងអន្តរកម្មធម្មតា» ប៉ុណ្ណោះ។

គួរបញ្ជាក់ថា កាលពីថ្ងៃទី២៨ ខែសីហា សារព័ត៌មាន Bloomberg បានរាយការណ៍ថា ទីក្រុងប៉េកាំងបានទាក់ទងដោយស្ងាត់ៗទៅកាន់ទីក្រុងញូវដេលី ក្នុងខែមីនា ដើម្បីស្ទង់មើលពីការកែលម្អទំនាក់ទំនង។

ហើយបើតាមមន្ត្រីនៅទីក្រុងញូវដេលីដែលដឹងពីបញ្ហានេះ បានប្រាប់ថា លោក Xi បានសរសេរលិខិតមួយច្បាប់ទៅកាន់សមភាគីឥណ្ឌា លោក Droupadi Murmu ដោយសម្តែងក្ដីបារម្ភអំពីកិច្ចព្រមព្រៀងរបស់សហរដ្ឋអាមេរិកណាមួយដែលនឹងធ្វើឲ្យប៉ះពាល់ដល់ផលប្រយោជន៍របស់ប្រទេសចិន។

តែជាការឆ្លើយតបទៅនឹងសំណួរ អំពីលិខិតនោះ ការិយាល័យអ្នកនាំពាក្យនៃក្រសួងការបរទេសចិន បានប្រាប់ថា «តាមដែលដឹង អ្វីហៅថា លិខិត ដែលបានលើកឡើងនោះ គឺមិនមានទាល់តែសោះ»។

ហើយក្រសួងបានបញ្ជាក់បន្ថែមថា កិច្ចប្រជុំរបស់លោក Xi ជាមួយលោក Modi នៅទីក្រុង Kazan ប្រទេសរុស្ស៊ី ក្នុងខែតុលា ឆ្នាំ២០២៤ បានជំរុញឲ្យមានទំនាក់ទំនងឡើងវិញ៕