រដ្ឋអាជ្ញាបានប្រាប់បណ្ដាញសារព័ត៌មានថា បុរសម្នាក់ បានបើករថយន្តបំបុកដោយចេតនាចូលទៅក្នុងហ្វូងមនុស្ស នៅខាងក្រៅបារមួយកន្លែង នៅភាគខាងជើងនៃប្រទេសបារាំង បន្ទាប់ពីមានជម្លោះ នាព្រឹកថ្ងៃសៅរ៍ (ទី៣០ ខែសីហា) នេះ ដោយបានបណ្ដាលឲ្យមនុស្សយ៉ាងតិចម្នាក់ស្លាប់ ហើយ ៥នាក់ផ្សេងទៀតរងរបួស។

ឧបទ្ទវហេតុនេះបានកើតឡើងនៅក្នុងទីក្រុង Evreux ក្នុងតំបន់ Normandy ភាគខាងជើងប្រទេសបារាំងនៅម៉ោងប្រហែល ៤:០០ព្រឹកថ្ងៃសៅរ៍ តាមពេលវេលាម៉ោងក្នុងស្រុក (ត្រូវនឹងម៉ោង ២:០០ ម៉ោងសកល) ។

ការស៊ើបអង្កេតមួយត្រូវបានបើកដំណើរការ ជុំវិញករណីមនុស្សឃាត និងប៉ុនប៉ងមនុស្សឃាត។ នេះបើយោងតាមការឲ្យដឹងពីរដ្ឋអាជ្ញា ដែលបានច្រានចោលពីមាន «អំពើភេរវករ» ឬហេតុផលរើសអើងជាតិសាសន៍។

រដ្ឋអាជ្ញាសាធារណៈក្រុង Evreux លោក Remi Coutin បានប្រាប់ឲ្យដឹងថា៖«"ជារឿងគួរសោកស្ដាយណាស់ មានអ្នកស្លាប់ និងរបួស»។ លោកបានបន្ថែមថា បុរសម្នាក់បានស្លាប់នៅនឹងកន្លែងកើតហេតុ ហើយមនុស្ស ៥នាក់បានរងរបួស ដោយក្នុងនោះ ២នាក់ ស្ថិតក្នុងសភាពធ្ងន់ធ្ងរ។

លោក Coutin បានបញ្ជាក់ថា «មានការឈ្លោះប្រកែកគ្នា» រវាងនារីវ័យក្មេងម្នាក់ និងបុរសប៉ុន្មាននាក់។ លោករដ្ឋអាជ្ញារូបនេះ បានឲ្យដឹងទៀតថា អ្នកធ្វើការក្នុងបារនោះ បាននាំភ្ញៀវទាំងអស់ចេញមកខាងក្រៅ។ បុរស២នាក់ និងស្ត្រីម្នាក់ ត្រូវបានចាប់ខ្លួន៕