មន្ត្រីជំនួយសង្គ្រោះ នៅថ្ងៃសៅរ៍ (ទី៣០ ខែសីហា) នេះ បានឲ្យដឹងថា មនុស្សជិតកន្លះលាននាក់ ត្រូវបានជម្លៀសដោយសារទឹកជំនន់ នៅភាគខាងកើតប្រទេសប៉ាគីស្ថាន បន្ទាប់ពីមានភ្លៀងធ្លាក់ខ្លាំងជាច្រើនថ្ងៃមកនេះ ខណៈពួកគេធ្វើប្រតិបត្តិការជួយសង្គ្រោះដ៏ធំមួយ។

ទន្លេហូរឆ្លងប្រទេសចំនួន ៣ កាត់តាមខេត្ត Punjab ដែលមានព្រំប្រទល់ជាប់ប្រទេសឥណ្ឌា បានហក់ឡើងដល់កម្រិតខ្ពស់ខ្លាំងខុសធម្មតា ដែលនាំឲ្យប៉ះពាល់ដល់ភូមិជាង ២.៣០០ភូមិ។

លោក Nabeel Javed ប្រធានសេវាផ្ដល់ជំនួយសង្គ្រោះរបស់រដ្ឋបាលខេត្ត Punjab បាននិយាយថា មនុស្ស ៤៨១.០០០នាក់ដែលជាប់ដោយសារទឹកជំនន់ ត្រូវបានជម្លៀស រួមជាមួយនឹងសត្វចិញ្ចឹម ៤០៥.០០០ក្បាល។ លោកបានបញ្ជាក់ថា សរុបមក មនុស្សជាង ១.៥លាននាក់ បានរងផលប៉ះពាល់ដោយសារទឹកជំនន់។

លោក Irfan Ali Khan ប្រធានទីភ្នាក់ងារគ្រប់គ្រងគ្រោះមហន្តរាយខេត្ត បានកត់សម្គាល់នៅក្នុងសន្និសីទសារព័ត៌មានមួយថា៖ «នេះគឺជាប្រតិបត្តិការជួយសង្គ្រោះដ៏ធំបំផុត នៅក្នុងប្រវត្តិសាស្រ្តរបស់ខេត្ត Punjab»។

លោកបានបន្ថែមថា ទូកជាង ៨០០គ្រឿង និងបុគ្គលិកសង្គ្រោះជាង ១.៣០០នាក់ បានចូលរួមក្នុងប្រតិបត្តិការជួយជម្លៀសគ្រួសារដែលភាគច្រើនមកពីតំបន់ជនបទក្បែរច្រាំងទន្លេទាំង៣។

នៅពាក់កណ្តាលខែសីហា ប្រជាជនប៉ាគីស្ថានជាង ៤០០នាក់ បានបាត់បង់ជីវិត ក្នុងរយៈពេលត្រឹមតែប៉ុន្មានថ្ងៃ ដោយសារបំណាក់ដីដែលបង្កឡើងដោយភ្លៀងធ្លាក់ខ្លាំង នៅផ្នែកម្ខាងទៀតនៃប្រទេសនេះ ក្នុងខេត្ត Khyber Pakhtunkhwa ជិតប្រទេសអាហ្វហ្គានីស្ថាន៕