សារព័ត៌មាន Washington Post បានរាយការណ៍នៅថ្ងៃអាទិត្យ (៣១ សីហា) ថា ផែនការក្រោយសង្រ្គាមមួយសម្រាប់តំបន់ហ្កាហ្សា កំពុងតែត្រូវយកទៅពិចារណាក្នុងរដ្ឋបាលលោកប្រធានាធិបតី Donald Trump ដែលនឹងមើលឃើញ សហរដ្ឋអាមេរិក គ្រប់គ្រងដែនដីហែកហួរដោយសង្រ្គាមនេះ រយៈពេលយ៉ាងតិចមួយទសវត្សរ៍ និងការផ្លាស់ទីលំនៅរបស់ប្រជាជនហ្កាហ្សា ព្រមទាំងការកសាងឡើងវិញ ឱ្យក្លាយជារមណីយដ្ឋានទេសចរណ៍ និងមជ្ឈមណ្ឌលផលិតកម្ម។

កាសែត Washington Post និយាយថា យោងតាមសៀវភៅផែនការ ៣៨ទំព័រ ដែលខ្លួនមើលឃើញ បានបង្ហាញថា ប្រជាជនប៉ាឡេស្ទីន ២លាននាក់ នៅហ្កាហ្សា អាចនឹងចាកចេញជាបណ្តោះអាសន្នតាមរយៈការចាកចេញ «ដោយស្ម័គ្រចិត្ត» ទៅកាន់ប្រទេសមួយផ្សេងទៀត ឬទៅកាន់តំបន់ហាមឃាត់មួយចំនួនក្នុងទឹកដីនេះ អំឡុងការសាងសង់ឡើងវិញ។

សារព័ត៌មានរ៉យទ័រ កាលពីមុនក៏រាយការណ៍ថា មានសំណើមួយក្នុងការសាងសង់ជំរំទ្រង់ទ្រាយធំ ដែលហៅថា «តំបន់ឆ្លងកាត់មនុស្សធម៌» នៅខាងក្នុង - និងអាចនៅខាងក្រៅ - ហ្កាហ្សា សម្រាប់ដាក់ប្រជាជនប៉ាឡេស្ទីន។ ផែនការនោះឈ្មោះ មូលនិធិមនុស្សធម៌ហ្កាហ្សា ដែលគាំទ្រដោយអាមេរិក ឬហៅកាត់ថា GHF ដូចនឹងឈ្មោះក្រុមជំនួយដែលអាមេរិកគាំទ្រ នៅតំបន់ហ៊ុមព័ទ្ធនេះ។

Washington Post បន្តថា ម្ចាស់ដីធ្លីនៅហ្កាហ្សា នឹងត្រូវផ្តល់ជូន "បណ្ណឌីជីថល" ជាថ្នូរនឹងសិទ្ធិក្នុងការអភិវឌ្ឍឡើងវិញនូវទ្រព្យសម្បត្តិរបស់ពួកគេ ហើយជនជាតិប៉ាឡេស្ទីនម្នាក់ៗ ដែលចាកចេញពីទីនោះ នឹងត្រូវផ្តល់ជាសាច់ប្រាក់ និងប្រាក់ឧបត្ថម្ភចំនួន ៥.០០០ដុល្លារ ដើម្បីរ៉ាប់រងលើថ្លៃជួល ៤ឆ្នាំ ខណៈអ្នកទាំងនោះក៏នឹងត្រូវផ្ដល់ជូននូវស្បៀងអាហាររយៈពេល ១ឆ្នាំផងដែរ។

សេតវិមាន និងក្រសួងការបរទេសអាមេរិក មិនបានឆ្លើយតបលើសំណើសុំការអត្ថាធិប្បាយទេ ប៉ុន្តែផែនការកសាងតំបន់ហ្កាហ្សាឡើងវិញនេះ ហាក់ដូចជាស្របគ្នានឹងការអត្ថាធិប្បាយពីមុន ដែលធ្វើឡើងដោយលោក Trump ជុំវិញការកាន់កាប់តំបន់ប៉ាឡេស្ទីនមួយនេះ៕