ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃចន្ទ (១ កញ្ញា) នេះថា មេដឹកនាំកូរ៉េខាងជើង លោក គីម ជុងអ៊ុន បានចុះទៅត្រួតពិនិត្យខ្សែច្រវាក់ផលិតកម្មមីស៊ីលថ្មី និងដំណើរការស្វ័យប្រវត្តិកម្មផលិតមីស៊ីលរបស់ប្រទេស។

នៅក្នុងពេលត្រួតពិនិត្យនោះ លោក គីម បាននិយាយថា ទំនើបកម្មនៃដំណើរការផលិត នឹងជួយបង្កើនការត្រៀមខ្លួនប្រយុទ្ធរបស់អង្គភាពមីស៊ីលសំខាន់ៗ នេះបើយោងតាមរបាយការណ៍ KCNA ។

ដំណើររបស់លោក គីម នេះកើតឡើងនៅថ្ងៃអាទិត្យ ហើយបានធ្វើឡើងនៅមុនគម្រោងដំណើរទស្សនកិច្ចទៅកាន់ទីក្រុងប៉េកាំង ដើម្បីចូលរួមពិធីព្យុហយាត្រាយោធា ជាមួយប្រធានាធិបតីចិន លោក Xi Jinping និងប្រធានាធិបតីរុស្ស៊ី លោក Vladimir Putin។

កូរ៉េខាងជើង កំពុងស្ថិតក្រោមការដាក់ទណ្ឌកម្មអន្តរជាតិយ៉ាងធ្ងន់ធ្ងរលើកម្មវិធីអាវុធនុយក្លេអ៊ែ និងមីស៊ីលបាលីស្ទិករបស់ខ្លួន ដែលបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ ទោះយ៉ាងនេះក្ដី ក្រុមអ្នកជំនាញ និងមន្ត្រីអន្តរជាតិនិយាយថា ទណ្ឌកម្មទាំងនោះបានបាត់បង់ឥទ្ធិពលទៅហើយ ស្របពេលមានការកើនឡើងនៃការគាំទ្រផ្នែកសេដ្ឋកិច្ច យោធា និងនយោបាយពីសម្ព័ន្ធមិត្តរបស់កូរ៉េខាងជើង៕