ប្រធានាធិបតីឥណ្ឌូនេស៊ី លោក ប្រាបូវ៉ូ ស៊ូប៊ៀនតូ (Prabowo Subianto) បានសន្យាថានឹងលុបចោលអត្ថប្រយោជន៍បន្ថែម និងសិទ្ធិពិសេសរបស់សមាជិកសភា ដែលរួមទាំង ប្រាក់ឧបត្ថម្ភសម្រាប់លំនៅឋាន៥.២០០ដុល្លារ ដ៏ចម្រូងចម្រាសនោះ ក្នុងបំណងបន្ថូរបន្ថយកំហឹងជាសាធារណៈបន្ទាប់ពីការតវ៉ាទូទាំងប្រទេសបានបណ្ដាលឲ្យមនុស្ស៦នាក់បាត់បង់ជីវិត។ 

និស្សិតនិងក្រុមសង្គមស៊ីវិលឥណ្ឌូនេស៊ី   បានបញ្ឈប់ការតវ៉ា នៅថ្ងៃចន្ទនេះ បន្ទាប់ពីការផ្ទុះកំហឹងដ៏ខ្លាំងក្លារយៈពេលមួយសប្ដាហ៍ ជុំវិញការចំណាយរបស់ក្រុមសមាជិកសភា និងការឆ្លើយតបរបស់នគរបាល ដោយលើកឡើងពីក្ដីបារម្ភនៃវិធានការសន្តិសុខដ៏តឹងតែង បន្ទាប់ពីកុបកម្មដ៏ហិង្សាចាប់តាំងពីចុងសប្ដាហ៍មុនមក។

ការតវ៉ាបានផ្ទុះឡើងក្រោយការរីករាលដាលនៃវីដេអូអ្នកបើកបរទោចក្រយានយន្តម្នាក់ត្រូវបានរថយន្តតាកទិករបស់នគរបាលបុកនៅក្នុងការប្រមូលផ្តុំគ្នាកាលពីយប់ថ្ងៃព្រហស្បតិ៍សប្ដាហ៍មុន។

អមដោយមេដឹកនាំគណបក្សនយោបាយឥណ្ឌូនេស៊ីចំនួនប្រាំបីរូប លោក Subianto បានប្រាប់សន្និសីទសារព័ត៌មានតាមទូរទស្សន៍ក្នុងរដ្ឋធានីហ្សាការតាថា ពួកគេបានយល់ព្រមកាត់បន្ថយប្រាក់ឧបត្ថម្ភលំនៅដ្ឋាន និងផ្អាកការធ្វើដំណើរទៅក្រៅប្រទេសសម្រាប់សមាជិកសភា។ 

នេះ ជាសម្បទានដ៏កម្រក្នុងការឆ្លើយតបចំពោះការកើនឡើងនៃកំហឹងសាធារណៈ។

នៅថ្ងៃចន្ទនេះ លោក Subianto បាននិយាយថា សមាជិកសភានឹងមើលឃើញប្រាក់ឧបត្ថម្ភមួយចំនួន ត្រូវបានលុបចោល ហើយការធ្វើដំណើរទៅធ្វើការនៅបរទេសត្រូវបានផ្អាកក្រោមការហាមប្រាមថ្មី ។

ខណៈការតវ៉ាបានកើនឡើងនៅទូទាំងប្រទេសកាន់លទ្ធិប្រជាធិបតេយ្យដ៏ធំបំផុតទីបីរបស់ពិភពលោកមួយនេះ កាលពីសប្តាហ៍មុន លោក Subianto ក្នុងអំឡុងពេលចុងសប្តាហ៍ បានកោះហៅឥស្សរជនលេចធ្លោរបស់ប្រទេសនេះ ហើយបានលុបចោលដំណើរដ៏សំខាន់មួយទៅកាន់ប្រទេសចិន៕