ចៅក្រមសហព័ន្ធកាលពីថ្ងៃអាទិត្យ បានបញ្ឈប់រដ្ឋបាលរបស់លោក Trump ពីការនិរទេសកុមារជនជាតិកាតេម៉ាឡាអន្តោប្រវេសន៍ ដែលបានឡើងជិះលើយន្តហោះរួចហើយ ហើយអាចមានរាប់រយនាក់ទៀត នៅក្នុងទីជម្រករបស់រដ្ឋាភិបាល បន្ទាប់ពីមេធាវីរបស់ពួកគេបានប្តឹងឧទ្ធរណ៍បន្ទាន់នៅមុនពេលព្រឹកព្រលឹម។

កាលពីថ្ងៃអាទិត្យ មជ្ឈមណ្ឌលច្បាប់អន្តោប្រវេសន៍ជាតិដែលជាក្រុមតស៊ូមតិគាំទ្រជនអន្តោប្រវេសន៍ បានដាក់ញត្តិបន្ទាន់មួយទៅកាន់តុលាការតំបន់របស់សហរដ្ឋអាមេរិកក្នុងទីក្រុងវ៉ាស៊ីនតោនឌីស៊ី ដើម្បីបញ្ឈប់ការបញ្ជូនកុមារអន្តោប្រវេសន៍ដែលគ្មានអ្នករួមដំណើរចំនួន១០នាក់។

នៅក្នុងសវនាការដ៏កម្រមួយកាលពីចុងសប្តាហ៍ ចៅក្រមតំបន់លោកស្រី Sparkle Sooknanan បាននិយាយថា លោកស្រីត្រូវបានគេដាស់ឲ្យភ្ញាក់នៅម៉ោង២:៣៥នាទីព្រឹកម៉ោងក្នុងតំបន់ ហើយបានផ្តល់ដំណឹងអំពីករណីនេះ។ លោកស្រី Sooknanan បានចេញសេចក្តីបង្គាប់ផ្អាកបណ្ដោះអាសន្នពីការបញ្ជូនកុមារមានអាយុ១០ឆ្នាំដល់១៧ឆ្នាំ រយៈពេល១៤ថ្ងៃ។

លោកស្រី Sooknanan បានដាក់បន្ថែមសេចក្តីបង្គាប់ឱ្យរួមបញ្ចូលទាំងអនីតិជនដែលគ្មានអ្នករួមដំណើរជនជាតិកាតេម៉ាឡា នៅក្នុងមន្ទីរឃុំឃាំងរបស់ក្រសួងសុខាភិបាលនិងប្រជាសេវារបស់សហរដ្ឋអាមេរិក។ ពាក្យបណ្តឹងបាននិយាយថា ក្រុមនេះអាចមានចំនួនកុមាររាប់រយនាក់។

លោកប្រធានាធិបតី Donald Trump មកពីគណបក្សសាធារណរដ្ឋបានចាប់ផ្តើមការបង្ក្រាបការធ្វើអន្តោប្រវេសន៍បន្ទាប់ពីបានត្រឡប់ទៅកាន់សេតវិមានវិញកាលពីក្នុងខែមករា រួមទាំងកិច្ចខិតខំប្រឹងប្រែងដើម្បីតាមដាន និងនិរទេសកុមារអន្តោប្រវេសន៍ដែលពុំមានអ្នករួមដំណើរជាមួយ។