មន្ត្រីជាន់ខ្ពស់មួយរូបបាននិយាយថាខេត្ត Punjab ភាគខាងកើតប្រទេសប៉ាគីស្ថាន កំពុងទប់ទល់ជាមួយនឹងទឹកជំនន់ធំបំផុតក្នុងប្រវត្តិសាស្ត្ររបស់ខ្លួន ខណៈកម្រិតទឹកទន្លេឡើងដល់កម្រិតខ្ពស់។

យោងតាមការសិក្សាថ្មីបានឲ្យដឹងថា ការឡើងកម្តៅផែនដី បានធ្វើឱ្យភ្លៀងមូសុងកាន់តែមិនអំណោយផលនៅឆ្នាំនេះ នៅក្នុងប្រទេសប៉ាគីស្ថាន ជាប្រទេសមួយក្នុងចំណោមប្រទេសដែលងាយរងគ្រោះបំផុតចំពោះបម្រែបម្រួលអាកាសធាតុ។ ទឹកភ្លៀងធ្លាក់និងព្យុះភ្លៀង បានបង្កឱ្យមានទឹកជំនន់យ៉ាងគំហុក និងបំណាក់ដីនៅទូទាំងភាគខាងជើងនិងភាគភាគពាយ័ព្យតំបន់ភ្នំ ក្នុងប៉ុន្មានខែថ្មីៗនេះ។

អ្នកស្រុកនៅភាគខាងកើតខេត្ត Punjab បានជួបប្រទះបរិមាណទឹកភ្លៀងខុសប្រក្រតី ព្រមទាំងទឹកជំនន់ឆ្លងព្រំដែន បន្ទាប់ពីប្រទេសឥណ្ឌាបានបញ្ចេញទឹកពីទន្លេដែលហក់ឡើង និងទំនប់វារីអគ្គិសនីដែលពេញហៀរចូលទៅក្នុងតំបន់ទំនាបរបស់ប្រទេសប៉ាគីស្ថាន។

លោកស្រី Marriyum Aurangzeb រដ្ឋមន្ត្រីជាន់ខ្ពស់របស់ខេត្តបាននិយាយក្នុងសន្និសីទសារព័ត៌មានកាលពីថ្ងៃអាទិត្យថា «នេះគឺជាទឹកជំនន់ធំបំផុតក្នុងប្រវត្តិសាស្ត្ររបស់ខេត្ត Punjab។ ទឹកជំនន់បានធ្វើឲ្យប៉ះពាល់ដល់មនុស្សចំនួន២លាននាក់។

លោកស្រីនិយាយថា អាជ្ញាធរតំបន់បាននិងកំពុងជម្លៀសប្រជាជន និងប្រើប្រាស់ស្ថាប័នអប់រំ អគារនគរបាល និងអគារសន្តិសុខជាជំរំជួយសង្គ្រោះ។

ក្រុមអាជ្ញាធរប៉ាគីស្ថាន បាននិយាយថា ភ្លៀងរដូវមូសុងដ៏ធ្ងន់ធ្ងរ បានសម្លាប់មនុស្សយ៉ាងហោចណាស់៨៣០ នាក់ចាប់តាំងពីថ្ងៃទី២៦ ខែមិថុនា ខណៈទឹកជំនន់ និងបំណាក់ដីនៅតែបន្តរំខានដល់ជីវិតប្រចាំថ្ងៃនៅទូទាំងប្រទេស។