នៅពេលភ្លៀងធ្លាក់ខ្លាំងចាប់តាំងពីដើមខែសីហាមក បានបន្តជន់លិចផ្ទះសម្បែង និងជំរំភៀសខ្លួននៅទូទាំងខេត្តនានារបស់ប្រទេសយេម៉ែន អ្នកស្រុករងផលប៉ះពាល់ជាច្រើនកំពុងសម្តែងភាពអស់សង្ឃឹមចំពោះការខាតបង់យ៉ាងសន្ធឹកសន្ធាប់ និងការភ័យព្រួយថាស្ថានភាពអាចកាន់តែអាក្រក់ឡើង ខណៈប្រទេសកំពុងជួបវិបត្តិមនុស្សធម៌ដ៏អាក្រក់បំផុតមួយរបស់ពិភពលោករួចទៅហើយ។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ OCHA បាននិយាយកាលពីថ្ងៃទី២៤ សីហាថា ភ្លៀងធ្លាក់ខ្លាំង និងទឹកជំនន់ប៉ះពាល់ដល់មនុស្សរាប់ម៉ឺននាក់នៅយេម៉ែន ចាប់តាំងពីខែមេសាមក ដោយមានមនុស្សជាង ១០០នាក់ បានស្លាប់ ឬរងរបួស។ អង្គការទេសន្តរប្រវេសន៍អន្តរជាតិ (IOM) បានរាយការណ៍កាលពីថ្ងៃទី២៥ សីហាថា មនុស្សជាង ៤៦.៥០០នាក់ រងផលប៉ះពាល់នៅទូទាំង ៧៣ជុំរំភៀសខ្លួន ក្នុងប្រទេសនេះ ចាប់តាំងពីដើមខែសីហាមក។

ខេត្តនានារួមមាន Ibb, Sanaa, Marib, Hodeidah និង Taiz រងផលប៉ះពាល់ធ្ងន់ធ្ងរជាងគេ ដោយមានការបំផ្លិចបំផ្លាញផ្ទះសម្បែង ដីស្រែចំការ និងហេដ្ឋារចនាសម្ព័ន្ធជាច្រើន។ ជាមួយនឹងកន្លែងថែទាំសុខភាពទ្រុឌទ្រោម និងប្រព័ន្ធអនាម័យដួលរលំ ហានិភ័យនៃជំងឺអាសន្នរោគ និងជំងឺដែលឆ្លងតាមទឹក កំពុងកើនឡើងខ្លាំងនៅយេម៉ែន។ ភ្លៀងធ្លាក់ខ្លាំងបន្ថែមទៀតត្រូវបានព្យាករទុក ហើយភ្នាក់ងារមនុស្សធម៌កំពុងប្រឹងប្រែងផ្តល់ជំនួយ ខណៈអាជ្ញាធរមូលដ្ឋានសន្យាជួយសម្រួលដល់ការចែកចាយ។

ទន្ទឹមនឹងនេះ មន្ត្រីមកពីប្រទេសយេម៉ែន និងអង្គការអន្តរជាតិ កំពុងអំពាវនាវឱ្យមានអន្តរាគមន៍ និងជំនួយសកលជាបន្ទាន់ ដើម្បីទប់ទល់វិបត្តិមនុស្សធម៌ដែលមានស្រាប់ កុំឱ្យកាន់តែអាក្រក់ខ្លាំងឡើង៕