ប្រធានគណៈកម្មការអឺរ៉ុប លោកស្រី Ursula von der Leyen បានធ្វើដំណើរទស្សនកិច្ចនៅព្រំដែនប្រទេសប៉ូឡូញជាមួយប្រទេសបេឡារុសកាលពីថ្ងៃអាទិត្យដើម្បីបង្ហាញពីសាមគ្គីភាពជាមួយប្រទេសប៉ូឡូញជារដ្ឋជួរមុខដែលប្រឈមការវាយប្រហារកូនកាត់។

ថ្លែងរួមជាមួយនាយករដ្ឋមន្រ្តីប៉ូឡូញ លោក Donald Tusk ក្នុងអំឡុងដំណើរទស្សនកិច្ចនៅព្រំដែន លោកស្រី Von der Leyen បាននិយាយថា ថវិកាដែលបានស្នើឡើងសម្រាប់សហភាពអឺរ៉ុបពីឆ្នាំ២០២៨ដល់ឆ្នាំ២០៣៤មានគោលបំណងបង្កើនថវិកាចំនួនបីដងសម្រាប់ការធ្វើអន្តោប្រវេសន៍ និងការគ្រប់គ្រងព្រំដែន។

លោកស្រី បាននិយាយថា «រដ្ឋជាសមាជិក ដែលមានព្រំដែនផ្ទាល់ជាមួយរុស្ស៊ី និងបេឡារុស នឹងទទួលបានមូលនិធិបន្ថែមពីអឺរ៉ុប ព្រោះខ្ញុំចង់បញ្ជាក់ម្តងទៀតថា ព្រំដែនរបស់អឺរ៉ុបគឺជាការទទួលខុសត្រូវរួម»។ ប្រមុខសហភាពអឺរ៉ុបរូបនេះក៏បានសង្កត់ធ្ងន់ថា ប្រទេសប៉ូឡូញជារដ្ឋជួរមុខ បានប្រឈមនឹង «ការវាយប្រហារកូនកាត់ដោយចេតនានិងខ្លាំងក្លា» រយៈពេលជាច្រើនឆ្នាំមកហើយ។

លោក Tusk បានអំពាវនាវឱ្យមានការទប់ទល់ឲ្យបានខ្លាំងក្លាប្រឆាំងរុស្ស៊ីដោយប្រៀបធៀបស្ថានភាពបច្ចុប្បន្នទៅនឹងចលនាសាមគ្គីភាពរបស់ប្រទេសប៉ូឡូញកាលពី៤៥ឆ្នាំមុន។

ដំណើរទស្សនកិច្ចរបស់លោកស្រី Von der Leyen ទៅកាន់ប្រទេសប៉ូឡូញ គឺជាផ្នែកមួយនៃដំណើរទស្សនកិច្ចរយៈពេលបួនថ្ងៃរបស់លោកស្រីទៅកាន់រដ្ឋជួរមុខរបស់សហភាពអឺរ៉ុប ដែលរួមមានទាំងប្រទេសឡាតវី អេស្តូនី និងនិងប្រទេសហ្វាំងឡង់។ លោកស្រីបានទៅកាន់ប្រទេសប៊ុលហ្គារីកាលពីថ្ងៃអាទិត្យ ក្រោយមកប្រទេសលីទុយអានី និងរូម៉ានីនៅថ្ងៃចន្ទនេះ។