នៅទូទាំងតំបន់ដីវាលទំនាបមានជីជាតិនៃខេត្ត ផុនចាប របស់ប្រទេសប៉ាគីស្ថាន អ្នកស្រុកកំពុងតែជួបការលំបាកដើម្បីកសាងជីវិតរបស់ពួកគេឡើងវិញ បន្ទាប់ពីទឹកជំនន់ដ៏ប្រវត្តិសាស្រ្ត និងអាក្រក់បំផុតក្នុងរយៈពេលជាច្រើនទសវត្សរ៍ ដែលបានលេបត្របាក់ផ្ទះសម្បែង បំផ្លាញដំណាំយ៉ាងទូលំទូលាយ និងសម្លាប់បសុសត្វជាច្រើនក្បាល ដោយបានបង្កគំរាមកំហែងកាន់តែខ្លាំងឡើងដល់សេដ្ឋកិច្ចទ្រុឌទ្រោមរួចទៅហើយរបស់ប្រទេសនេះ។

អាជ្ញាធរគ្រប់គ្រងគ្រោះមហន្តរាយខេត្ត បាននិយាយថា មនុស្សជាង ២លាននាក់ បានរងផលប៉ះពាល់ ដោយមានភូមិជាង ២.០០០កន្លែង ត្រូវជន់លិច ខណៈមនុស្សប្រហែល ៧៦ម៉ឺននាក់ និងបសុសត្វជាង ៥សែនក្បាល ត្រូវបានជម្លៀសចេញ ហើយចំនួនអ្នកស្លាប់កើនឡើងជិតបន្ទាត់ ៩០០នាក់ ទូទាំងប្រទេសចាប់តាំងពីចុងខែមិថុនាមក។

ក្រុមមន្ត្រីនិយាយថា ទឹកជំនន់គឺអាក្រក់បំផុតក្នុងរយៈពេលជាច្រើនទស្សវត្សរ៍ ដោយនឹងមានភ្លៀងធ្លាក់កាន់តែច្រើនទៀត។ កសិករ និងអ្នកនាំចេញព្រមានថា ផលប៉ះពាល់លើវិស័យកសិកម្មនឹងមានកម្រិតខ្លាំង ដោយស្រូវ អំពៅ ពោត បន្លែ និងវាលកប្បាសនៅទូទាំងខេត្តផុនចាប ស្ថិតនៅក្រោមទឹកជំនន់។

មហន្តរាយនេះកើតឡើងនៅគ្រាដ៏រសើបសម្រាប់សេដ្ឋកិច្ចដ៏ផុយស្រួយរបស់ប៉ាគីស្ថាន ជាមួយនឹងទិន្នន័យអតិផរណាបានចុះត្រជាក់ដល់ ៤,១% ក្នុងខែកក្កដា ពីអត្រា ១១,១% កាលពីឆ្នាំមុន ហើយអតិផរណាម្ហូបអាហារដែលធ្លាប់ហក់ឡើងលើសពី ៥០% ក្នុងឆ្នាំ២០២៣ ក៏បានធូរស្រាលខ្លះដែរ ប៉ុន្តែគ្រោះធម្មជាតិនេះបានគំរាមកំហែងដាក់បន្ទុកកាន់តែអាក្រក់ជាថ្មីលើសេដ្ឋកិច្ច៕