ប្រធានាធិបតីចិន លោក Xi Jinping បានជំរុញមេដឹកនាំក្នុងតំបន់ឱ្យប្រឆាំងនឹង «ផ្នត់គំនិតនៃសង្រ្គាមត្រជាក់» នៅក្នុងការជួបប្រជុំនៃប្លុកសន្តិសុខដែលទីក្រុងប៉េកាំង បានចាត់ទុកថាជាជម្រើសចំពោះសណ្តាប់ធ្នាប់អន្តរជាតិដឹកនាំដោយប្រទេសលោកខាងលិច។

នៅក្នុងសុន្ទរកថាទៅកាន់អ្នកចូលរួមក្នុងកិច្ចប្រជុំកំពូលរបស់អង្គការសហប្រតិបត្តិការសៀងហៃ(SCO) នៅថ្ងៃចន្ទនេះ លោក Xi បាននិយាយថា រដ្ឋជាសមាជិកកំពុងប្រឈមនឹងបញ្ហាផ្នែកសន្តិសុខ និងការអភិវឌ្ឍន៍កាន់តែស្មុគស្មាញ ខណៈពិភពលោកកាន់តែមានភាពវឹកវរនិងប្រទាក់ក្រឡាគ្នា។ លោក Xi បាននិយាយថា «សូមក្រឡេកមើលទៅក្រោយ ទោះបីជាពេលវេលាមានភាពច្របូកច្របល់ក៏ដោយ យើងបានទទួលជោគជ័យដោយការអនុវត្តស្មារតីនៃក្រុងសៀងហៃ»។ «សម្លឹងមើលទៅអនាគត ដោយពិភពលោកកំពុងឆ្លងកាត់ភាពច្របូកច្របល់ និងការផ្លាស់ប្តូរ យើងត្រូវបន្តធ្វើតាមស្មារតីសៀងហៃ មានសុភវិនិច្ឆ័យ ឈានឆ្ពោះទៅមុខ និងអនុវត្តមុខងាររបស់អង្គការនេះឱ្យកាន់តែប្រសើរ»។

ដោយអំពាវនាវឱ្យមាន «ពហុប៉ូលដោយស្មើភាពនិងសណ្តាប់ធ្នាប់»នៃពិភពលោក លោក Xi បាននិយាយថា ប្លុកនេះគួរតែធ្វើការឆ្ពោះទៅរកការបង្កើត «ប្រព័ន្ធអភិបាលកិច្ចសកលកាន់តែត្រឹមត្រូវ និងសមភាព»។ មេដឹកនាំប្រទេសចិនរូបនេះបាននិយាយថា ទីក្រុងប៉េកាំងនឹងផ្តល់ជំនួយចំនួន២ពាន់លានយ័ន (២៨០លានដុល្លារ) ដល់រដ្ឋជាសមាជិកនៅឆ្នាំនេះ និងប្រាក់កម្ចី១០ពាន់លានយ័ន(១,៤ពាន់លានដុល្លារ)បន្ថែមទៀតដល់សម្ព័ន្ធធនាគារអង្គការសហប្រតិបត្តិការសៀងហៃ(SCO)។ លោក Xi និយាយថា «យើងត្រូវតែទាញយកប្រយោជន៍ពីទីផ្សារខ្នាតធំ ដើម្បីធ្វើឲ្យប្រសើរកម្រិតនៃការសម្របសម្រួលពាណិជ្ជកម្ម និងការវិនិយោគ»។ ប្រធានាធិបតីរុស្ស៊ី លោក Vladimir Putin នាយករដ្ឋមន្ត្រីឥណ្ឌា លោក Narendra Modi ប្រធានាធិបតីអ៊ីរ៉ង់ លោក Masoud Pezeshkian និងប្រធានាធិបតីបេឡារុស លោក Alexander Lukashenko ស្ថិតក្នុងចំណោមមេដឹកនាំដែលចូលរួមជាង២០រូបនៅក្នុងកិច្ចប្រជុំកំពូលអង្គការសហប្រតិបត្តិការសៀងហៃ(SCO)រយៈពេលពីរថ្ងៃដែលបានបើកកាលពីថ្ងៃអាទិត្យនៅទីក្រុង Tianjin ភាគខាងជើងប្រទេសចិន។