ទីភ្នាក់ងារអង្គការសហប្រជាជាតិ ទទួលបន្ទុកជនភៀសខ្លួនប៉ាឡេស្ទីន (UNRWA) បានប្រកាសអាសន្នកាលពីថ្ងៃសៅរ៍ (៣០ សីហា) ជុំវិញជោគវាសនានៃការអប់រំ និងជំនាន់មនុស្សនៅដែនដីហ្កាហ្សា ដោយព្រមានថា កុមារជាង ៦៦០.០០០នាក់ មិនទទួលបានការសិក្សានោះទេរយៈពេល ៣ឆ្នាំជាប់ៗគ្នាហើយ ខណៈសង្រ្គាមដ៏បំផ្លិចបំផ្លាញរបស់អ៊ីស្រាអែល ជិតដល់អាយុកាល ២ឆ្នាំ។

UNRWA បាននិយាយក្នុងសេចក្តីថ្លែងការណ៍មួយថា៖ សង្រ្គាមនៅហ្កាហ្សា គឺជាសង្រ្គាមលើកុមារ ហើយត្រូវតែបញ្ឈប់ជាបន្ទាន់ កុមារត្រូវតែត្រូវទទួលបានការការពារគ្រប់ពេលវេលា ខណៈយុវជននៃក្រុមនេះគឺមានហានិភ័យក្នុងការក្លាយជា «ជំនាន់ដែលបាត់បង់» ដោយសារតែភាពឃោរឃៅនាពេលបច្ចុប្បន្ន។ ខណៈដែលសាលារៀននៅតំបន់កាន់កាប់ West Bank គ្រោងបើកឡើងវិញនៅថ្ងៃទី១ ខែកញ្ញានេះ ថ្នាក់រៀននៅតំបន់ហ្កាហ្សា នៅតែបន្តបិទ។

អាជ្ញាធរអប់រំប៉ាឡេស្ទីន បាននិយាយថា សិស្សប្រហែល ៧សែននាក់ ក្នុងដែនដីហ៊ុមព័ទ្ធនេះ ត្រូវបង្ខំចិត្តផ្អាកការសិក្សា ដោយសារសាលារៀនស្ថិតក្រោមការទម្លាក់គ្រាប់បែក ហើយជាង ៧ម៉ឺននាក់ មិនអាចប្រឡងមធ្យមសិក្សាទុតិយភូមិបានឡើយ ក្នុងរយៈពេល ២ឆ្នាំជាប់គ្នាមកហើយ។

ផលប៉ះពាល់នេះបានគ្របដណ្ដប់ដល់គ្រូបង្រៀន និងបុគ្គលិកសិក្សា ដោយទិន្នន័យប៉ាឡេស្ទីនបង្ហាញថា បុគ្គលិកអប់រំជិត ១ពាន់នាក់ ត្រូវបានសម្លាប់នៅហ្កាហ្សា ហើយរាប់ពាន់នាក់ទៀតរងរបួស ឬត្រូវបានឃុំខ្លួននៅទូទាំងទឹកដីប៉ាឡេស្ទីនទាំងនោះ៕