យោងតាមកាសែត New York Times កាលពីថ្ងៃអាទិត្យបានឲ្យដឹងថា រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump បានពង្រីកការរឹតបន្តឹងទិដ្ឋាការរបស់ខ្លួនលើអ្នកកាន់លិខិតឆ្លងដែនប៉ាឡេស្ទីន ដោយបញ្ឈប់ការអនុម័តសម្រាប់ស្ទើរតែគ្រប់ប្រភេទនៃទិដ្ឋាការភ្ញៀវទេសចរមិនមែនអន្តោប្រវេសន៍។

របាយការណ៍បាននិយាយថា បម្រាមដែលត្រូវបានពង្រីកនេះគ្របដណ្តប់លើកម្មវិធីសម្រាប់ការព្យាបាលផ្នែកវេជ្ជសាស្រ្ត ការសិក្សានៅសាកលវិទ្យាល័យ ការធ្វើដំណើរអាជីវកម្ម និងការទៅលេងមិត្តភក្តិ ឬក្រុមគ្រួសារ។

វិធានការនេះ ត្រូវបានដាក់ចេញតាមបណ្តាញកាលពីថ្ងៃទី១៨ ខែសីហា ពីក្រសួងការបរទេសទៅកាន់ស្ថានទូត និងស្ថានកុងស៊ុលសហរដ្ឋអាមេរិក ដោយបង្ហាញពីការពង្រីកវិធានការអនុវត្តចំពោះពលរដ្ឋរស់នៅក្នុងតំបន់ហ្កាហ្សា។ គោលនយោបាយថ្មីនេះ ផ្តោតលើពលរដ្ឋប៉ាឡេស្ទីននៅតំបន់ West Bank និងនៅទូទាំងតំបន់ជនភៀសខ្លួន។

កាលពីដើមខែនេះ រដ្ឋបាលរបស់លោក Trump ក៏បានលុបចោលទិដ្ឋាការពីសមាជិកនៃអង្គការរំដោះប៉ាឡេស្ទីន និងអាជ្ញាធរប៉ាឡេស្ទីន ដោយរារាំងពួកគេមិនឱ្យចូលរួមក្នុងមហាសន្និបាតអង្គការសហប្រជាជាតិនៅទីក្រុងញូវយ៉ក នាពេលខាងមុខ។ ក្រសួងការបរទេសសហរដ្ឋអាមេរិក បាននិយាយថា ការសម្រេចនេះគឺផ្អែកលើការព្រួយបារម្ភសន្តិសុខជាតិ ដោយចោទប្រកាន់មេដឹកនាំប៉ាឡេស្ទីនថា មិនបានបោះបង់អំពើភេរវកម្មឡើយ។