ប្រទេសជប៉ុនបានថ្កោលទោសយ៉ាងដាច់អហង្ការចំពោះ «ការវាយប្រហារភេរវកម្ម» ដែលធ្វើឡើងដោយក្រុមហាម៉ាសប្រឆាំងនឹងអ៊ីស្រាអែល ប្រហែលពីរឆ្នាំកន្លងទៅ ហើយបានអំពាវនាវឲ្យមានការដកអាវុធពីក្រុមហាម៉ាស។

ការថ្កោលទោសនេះ ត្រូវបានធ្វើឡើង ក្នុងកិច្ចប្រជុំនៅទីក្រុងតូក្យូកាលពីសប្តាហ៍មុន រវាងរដ្ឋមន្ត្រីការបរទេសជប៉ុនលោក FUJII Hisayuki និងលោក Amir Ohana ប្រធានសភាអ៊ីស្រាអែល។

លោក Ohana និងឪពុករបស់បុគ្គលអ៊ីស្រាអែលម្នាក់ ដែលត្រូវបានក្រុមហាម៉ាសចាប់ឃុំខ្លួន ត្រូវបានរដ្ឋាភិបាលជប៉ុនអញ្ជើញទៅទីក្រុងតូក្យូ។ ក្នុងអំឡុងពេលសន្និសីទសារព័ត៌មាន លោកទាំងពីរ បានសម្តែងអំណរគុណចំពោះ «ជំនួយ និងការគាំទ្រដែលជប៉ុនកំពុងផ្តល់ឲ្យអ៊ីស្រាអែល»។

យោងតាមក្រសួងការបរទេសនៅទីក្រុងតូក្យូ លោក Fujii បានសម្តែងការព្រួយបារម្ភចំពោះអ្វីដែលលោកបានពិពណ៌នាថា ជា «ស្ថានភាពមនុស្សធម៌ដែលកាន់តែធ្ងន់ធ្ងរ នៅក្នុងតំបន់ហ្កាហ្សា»។ លោកបានជំរុញឲ្យអ៊ីស្រាអែលខិតខំប្រឹងប្រែងបន្ថែមទៀត ដើម្បីសម្រេចបានបទឈប់បាញ់ឲ្យបានឆាប់តាមដែលអាចធ្វើទៅបាន និងកែលម្អលក្ខខណ្ឌមនុស្សធម៌។

លោកFujii ក៏បានបញ្ជាក់ផងដែរថា ការគាំទ្រជាបន្តរបស់ប្រទេសជប៉ុនសម្រាប់ការសម្រេចបាននូវដំណោះស្រាយរដ្ឋពីរ តម្រូវឲ្យមានវិធានការកសាងទំនុកចិត្ត និងការចរចារវាងភាគីពាក់ព័ន្ធ។

ជាការឆ្លើយតប លោកប្រធានសភា Ohana បានពន្យល់ពីជំហររបស់អ៊ីស្រាអែល ប៉ុន្តែក្រសួងមិនបាន    ផ្តល់ព័ត៌មានលម្អិតណាមួយបន្ថែមទៀតទេ។