ក្រសួងការពារជាតិរបស់ទីក្រុងសេអ៊ូល នៅថ្ងៃចន្ទ (ទី១ ខែកញ្ញា) នេះ បានប្រាប់ឲ្យដឹងថា ប្រទេសកូរ៉េខាងត្បូង បានផ្អាកការផ្សាយតាមវិទ្យុយោធាដែលបញ្ជូនទៅកាន់ប្រទេសកូរ៉េខាងជើង ដោយការសម្រេចនេះជាផ្នែកនៃវិធានការ ដែលធ្វើឡើងក្នុងគោលបំណងបន្ធូរបន្ថយភាពតានតឹងជាមួយទីក្រុងព្យុងយ៉ាង។

នេះគឺជាលើកទី១ ហើយ ដែលកូរ៉េខាងត្បូងបានបញ្ឈប់ការផ្សាយតាមវិទ្យុ ក្នុងរយៈពេល ១៥ឆ្នាំ គិតចាប់តាំងពីប្រទេសទាំង២ បានចាប់ផ្ដើមធ្វើបែបនោះឡើងវិញ បន្ទាប់ពីកូរ៉េខាងជើងបានពន្លិចនាវាចម្បាំងកូរ៉េខាងត្បូង។

ការផ្សាយតាមវិទ្យុដែលមានឈ្មោះថា «សំឡេងនៃសេរីភាព» មានប្រភេទព័ត៌មានជាច្រើន ដូចជាដំណឹងរបបកូរ៉េខាងជើង ការអភិវឌ្ឍសេដ្ឋកិច្ចរបស់កូរ៉េខាងត្បូង ឬវប្បធម៌ខេប៉ុប (តារាកូរ៉េខាងត្បូង)។ វាត្រូវបានប្រើប្រាស់ជាឧបករណ៍មួយរបស់កូរ៉េខាងត្បូង ដើម្បីបង្កសង្គ្រាមចិត្តសាស្ត្រប្រឆាំងនឹងកូរ៉េខាងជើង។

អ្នកនាំពាក្យរងរបស់ក្រសួង លោក Lee Kyung-ho បានប្រាប់សន្និសីទសារព័ត៌មានថា៖ «ក្រសួងការពារជាតិបានផ្អាកការផ្សាយកម្មវិធីសំឡេងសេរីភាព ដែលជាផ្នែកមួយនៃវិធានការ ដើម្បីបន្ធូរបន្ថយភាពតានតឹងផ្នែកយោធា រវាងកូរ៉េខាងត្បូង និងខាងជើង»។

ភ្លាមៗ បន្ទាប់ពីលោកឡើងកាន់តំណែង ក្នុងខែមិថុនា រដ្ឋបាលរបស់ប្រធានាធិបតីកូរ៉េខាងត្បូង លោក Lee Jae Myung បានបិទការផ្សាយតាមឧបករណ៍បំពងសំឡេងឃោសនា នៅតាមព្រំដែន ដែលរិះគន់របបកូរ៉េខាងជើង ខណៈដែលខ្លួនសម្លឹងដល់ការស្តារឡើងវិញនូវកិច្ចសន្ទនាដែលជាប់គាំងជាមួយប្រទេសជិតខាង។

គួរបញ្ជាក់ថា ប្រទេសចកូរ៉េទាំង២ នៅតែមានសង្គ្រាមជាមួយគ្នាតាមលក្ខណៈបច្ចេកទេស គិតចាប់តាំងពីជម្លោះឆ្នាំ១៩៥០-១៩៥៣ បានបញ្ចប់ដោយសារមានបទឈប់បាញ់ តែមិនមែនជាសន្ធិសញ្ញាសន្តិភាពនោះឡើយ៕