នៅក្នុងបទសម្ភាសន៍មួយដែលត្រូវបានចេញផ្សាយកាលពីថ្ងៃអាទិត្យ (ទី៣១ ខែសីហា) ប្រធានគណៈកម្មការអឺរ៉ុប លោកស្រី Ursula von der Leyen បានប្រាប់សារព័ត៌មាន Financial Times (FT) ថា អឺរ៉ុបកំពុងរៀបចំ «ផែនការយ៉ាងម៉ត់ចត់» សម្រាប់ការដាក់ពង្រាយកងទ័ពចម្រុះជាតិសាសន៍ទៅកាន់អ៊ុយក្រែន ជាផ្នែកមួយនៃការធានាសន្តិសុខក្រោយជម្លោះ ដែលនឹងមានការគាំទ្រពីធនធានរបស់សហរដ្ឋអាមេរិក។

លោកស្រីបណ្ឌិត von der Leyen បានប្រាប់សារព័ត៌មាន FT ថា «លោក Donald Trump បានធានាដល់ពួកយើងជាថ្មីថា នឹងមានវត្តមានរបស់អាមេរិក ដែលជាផ្នែកនៃការធានាសុវត្ថិភាព »។ លោកស្រីបានបន្ថែមថា «នោះគឺមានភាពច្បាស់លាស់ណាស់ និងត្រូវបានបញ្ជាក់ម្តងហើយម្តងទៀត»។

សេចក្តីរាយការណ៍ពីសារព័ត៌មាននេះ បានឲ្យដឹងទៀតថា ការដាក់ពង្រាយនេះគ្រោងនឹងរួមបញ្ចូលនាពេលខាងមុខនូវទាហានរាប់ម៉ឺននាក់ដឹកនាំដោយអឺរ៉ុប ដែលមានការគាំទ្រពីជំនួយពីសហរដ្ឋអាមេរិក ក្នុងនោះរួមទាំងប្រព័ន្ធគ្រប់គ្រង និងបញ្ជា ក៏ដូចជាឧបករណ៍ស៊ើបការណ៍ និងឃ្លាំមើល ដោយបន្ថែមថា ការរៀបចំនេះត្រូវបានយល់ព្រមនៅក្នុងកិច្ចប្រជុំ រវាងប្រធានាធិបតីអាមេរិក លោក Donald Trump ប្រធានាធិបតីអ៊ុយក្រែន លោក Volodymyr Zelensky និងមេដឹកនាំជាន់ខ្ពស់អឺរ៉ុប កាលពីខែសីហា។

ជាមួយគ្នានេះ ដោយដកស្រង់ប្រភពការទូតចំនួន ៣ ដែលរៀបរាប់បា្រប់អំពីគម្រោងនេះ សារព័ត៌មាន FT បានបញ្ជាក់ថា មេដឹកនាំអឺរ៉ុប រួមមានអធិការបតីអាល្លឺម៉ង់ លោក Friedrich Merz នាយករដ្ឋមន្រ្តីអង់គ្លេស លោក Keir Starmer អគ្គលេខាធិការអង្គការណាតូ លោក Mark Rutte និងលោកស្រី von der Leyen ត្រូវបានគេរំពឹងថា នឹងជួបជុំគ្នា នៅទីក្រុងប៉ារីស នាថ្ងៃទី៤ ខែកញ្ញា តាមការអញ្ជើញរបស់ប្រធានាធិបតីបារាំង លោក Emmanuel Macron ដើម្បីបន្តកិច្ចពិភាក្សាកម្រិតខ្ពស់ ស្តីពីអ៊ុយក្រែន៕