ប្រធានសភានៃប្រទេសលីបង់ លោក Nabih Berri ដែលជាសម្ព័ន្ធមិត្តរបស់ក្រុមហេសបូឡា ដែលគាំទ្រដោយអ៊ីរ៉ង់កាលពីថ្ងៃអាទិត្យ បានអំពាវនាវឲ្យមានការសន្ទនាគ្នាជុំវិញអាវុធរបស់ក្រុមនេះ រយៈពេលប៉ុន្មានថ្ងៃ មុនពេលរដ្ឋាភិបាល ត្រូវបានគេរំពឹងថា នឹងអនុម័តផែនការកងទ័ព ដើម្បីដកហូតអាវុធពីក្រុមនេះ។

រយៈពេលប៉ុន្មានខែ បន្ទាប់ពីសង្គ្រាមដ៏បំផ្លិចបំផ្លាញរបស់ក្រុមហេសបូឡា ជាមួយអ៊ីស្រាអែល និងក្រោមសម្ពាធយ៉ាងធ្ងន់ធ្ងររបស់សហរដ្ឋអាមេរិក រដ្ឋាភិបាលនៃប្រទេសលីបង់ក្នុងខែនេះ បានប្រគល់ភារកិច្ចឲ្យ កងទ័ពរៀបចំផែនការដកហូតអាវុធពីក្រុមហេបូឡា នៅចុងឆ្នាំនេះ។

ក្រុមហេសបូឡា បានប្រឆាំងជាដាច់ខាតចំពោះការសម្រេចចិត្តនេះ និងរដ្ឋមន្ត្រីឥស្លាមនិកាយស៊ីអ៊ីត (Shiite) រួមទាំងអ្នកតំណាងមកពីក្រុម និងចលនា Amal របស់លោក Berri បានខ្លួនដកចេញពីសម័យប្រជុំរដ្ឋាភិបាល នៅក្នុងការតវ៉ាជំទាស់។

លោក Berri មេដឹកនាំស៊ីអ៊ីតដ៏មានឥទ្ធិពលម្នាក់ បាននិយាយនៅក្នុងសុន្ទរកថារំលឹកការបាត់ខ្លួននៅឆ្នាំ ១៩៧៨ របស់ស្ថាបនិកចលនា Amal លោក Musa Al-Sadrថា៖«យើងសូមបញ្ជាក់ម្តងទៀតថា យើងបើកចំហ ដើម្បីពិភាក្សាអំពីជោគវាសនានៃអាវុធទាំងនោះ…នៅក្នុងការសន្ទនាដោយស្ងប់ស្ងាត់ និងឯកភាពគ្នា។ 

រដ្ឋមន្ត្រីលីបង់ គ្រោងនឹងជួបគ្នាម្ដងទៀត នៅថ្ងៃសុក្រ បន្ទាប់ពីទទួលបានផែនការរបស់កងទ័ព។

លោក Berri បានរិះគន់ចំណាត់ការរបស់រដ្ឋាភិបាល ដែលផ្អែកលើសំណើរបស់សហរដ្ឋអាមេរិក។