ប្រធានាធិបតីរុស្ស៊ី លោក Vladimir Putin នៅថ្ងៃចន្ទ (ទី១ ខែកញ្ញា) បានឲ្យដឹងថា «ការព្រមព្រៀង» ដែលលោកបានឈានដល់ជាមួយប្រធានាធិបតីអាមេរិក លោក Donald Trump នៅឯជំនួបកំពូល កាលពីខែសីហា បានបើកឲ្យមានផ្លូវឆ្ពោះទៅរកសន្តិភាព នៅអ៊ុយក្រែន ជាអ្វីដែលលោកនឹងពិភាក្សាជាមួយបណ្ដាមេដឹកនាំដែលចូលរួមក្នុងកិច្ចប្រជុំកំពូលក្នុងតំបន់ នៅប្រទេសចិន។

ទីក្រុងគីវ និងសម្ព័ន្ធមិត្តលោកខាងលិចរបស់ខ្លួន ចាត់ទុកការលុកលុយឈ្លានពានទ្រង់ទ្រាយធំរបស់រុស្ស៊ីលើអ៊ុយក្រែន ដែលបានចាប់ផ្តើមកាលពីខែកុម្ភៈ ឆ្នាំ២០២២ថា ជាសង្រ្គាមចក្រពត្តិវាតទីដណ្តើមយកដែនដីដាក់បញ្ចូលជាឧបសម្ព័ន្ធ ទោះបីជារុស្ស៊ីប្រាប់ថា នេះគឺជាប្រតិបត្តិការយោធាពិសេស ក្នុងគោលបំណងធ្វើឲ្យអ៊ុយក្រែនគ្មានយោធា និងអស់ពួកណាហ្ស៊ីនិយមក៏ដោយ។

លោក Putin នាយករដ្ឋមន្រ្តីឥណ្ឌា លោក Narendra Modi និងមេដឹកនាំទៅពីអាស៊ីកណ្តាល មជ្ឈិមបូព៌ា អាស៊ីខាងត្បូង និងអាស៊ីអាគ្នេយ៍ កំពុងចូលរួមវេទិកាអង្គការសហប្រតិបត្តិការសៀងហៃ នៅទីក្រុង Tianjin ដែលធ្វើជាម្ចាស់ផ្ទះប្រធានាធិបតីចិន លោក Xi Jinping។

លោក Putin បានប្រាប់វេទិការនេះថា៖ «យើងសូមកោតសរសើរយ៉ាងខ្លាំង ចំពោះកិច្ចប្រឹងប្រែង និងសំណើរបស់ប្រទេសចិន និងឥណ្ឌា ដែលមានបំណងសម្របសម្រួលដល់ការដោះស្រាយវិបត្តិអ៊ុយក្រែន។ ខ្ញុំសង្ឃឹមថា ការព្រមព្រៀងយោគយល់គ្នាដែលបានឈានដល់ក្នុងកិច្ចប្រជុំរុស្ស៊ី-អាមេរិក នាពេលថ្មីៗនេះ នៅរដ្ឋ Alaska ក៏រួមចំណែកដល់គោលដៅនេះផងដែរ»។

មេដឹកនាំរុស្ស៊ីរូបនេះបានបន្ថែមថា លោកបានរៀបរាប់យ៉ាងលម្អិតជូនលោក Xi រួចហើយ កាលពីថ្ងៃអាទិត្យ (ទី៣១ ខែសីហា) អំពីសមិទ្ធិផលនៃកិច្ចពិភាក្សារបស់លោកជាមួយលោក Trump និងការងារ ដែល «កំពុងដំណើរការរួចហើយ» ដើម្បីដោះស្រាយជម្លោះ ហើយនឹងផ្តល់ព័ត៌មានលម្អិតបន្ថែមទៀត នៅក្នុងកិច្ចប្រជុំ ២ភាគី ជាមួយមេដឹកនាំចិន និងផ្សេងទៀត៕