ប្រធានាធិបតីរុស្ស៊ីលោក Vladimir Putin និយាយប្រាប់សមភាគីទួរគីលោក Tayyip Erdogan ថា ទួរគីគឺជាដៃគូអាចជឿទុកចិត្តបានសម្រាប់រុស្ស៊ី ហើយកិច្ចសហប្រតិបត្តិការថាមពល រវាងប្រទេសទាំង ២ គឺជាយុទ្ធសាស្រ្ត ។ លោកថ្លែងបែបនេះ អំឡុងជំនួបនៅក្រៅកិច្ចប្រជុំកំពូលអង្គការសហប្រតិបត្តិការក្រុងសៀងហៃ(SCO) នៅប្រទេសចិន ។

លោកនិយាយថា ពួកយើងមានការដឹងគុណចំពោះមិត្តទួរគីសម្រាប់ការរួមចំណែកដ៏សំខាន់របស់ពួកគេនៅក្នុងកិច្ចខិតខំការទូត និងនយោបាយ ដើម្បីដោះស្រាយវិបត្តិអ៊ុយក្រែន ។

លោក Putinបន្តថា ចាប់តាំងពីខែឧសភារហូតមក ៣ជុំនៃកិច្ចប្រជុំដោយផ្ទាល់រវាងរុស្ស៊ី និងអ៊ុយក្រែន បានធ្វើឡើងនៅទីក្រងអ៊ីស្តង់ប៊ុល ដែលបានជួយសម្រេចបានវឌ្ឍនភាពលើបញ្ហាមនុស្សធម៌ជាច្រើន ហើយលោកមានជំនឿថា តួនាទីដ៏វិសេសវិសាលរបស់ទួរទីលើបញ្ហាទាំងអស់នេះ នៅតែត្រូវការ ។

ខណៈពេលនោះដែរ លោក Erdogan និយាយប្រាប់លោក Putinថា ទីក្រុងអង់ការ៉ា ធ្វើការដើម្បីបញ្ចប់ដ៏ត្រឹមត្រូវ និងយូរអង្វែងសង្រ្គាមនៅអ៊ុយក្រែន ហើយកិច្ចប្រជុំរវាងភាគីពាក់ព័ន្ធនៅទីក្រុងអ៊ីស្តង់ប៊ុល រួមចំណែកនៅក្នុងកិច្ចខិតខំស្វែងរកសន្តិភាព ៕