ក្រុមអ្នករៀបចំ នៅថ្ងៃចន្ទ (ទី១ ខែកញ្ញា) នេះ បានប្រាប់ឲ្យដឹងថា ក្រុមទូកជំនួយរាប់សិបគ្រឿង ដែលបានធ្វើដំណើរទៅកាន់តំបន់ហ្កាហ្សា កាលពីថ្ងៃអាទិត្យ ដែលដឹកជំនួយ និងសកម្មជនគាំទ្រប៉ាឡេស្ទីន ក្នុងនោះរួមមានទាំងអ្នកធ្វើយុទ្ធនាការអាកាសធាតុ នាង Greta Thunberg ផងដែរ បានវិលត្រលប់ចូលកំពង់ផែ ក្នុងទីក្រុង Barcelona ប្រទេសអេស្ប៉ាញវិញ ដោយសារអាកាសធាតុមានព្យុះ។

បេសកកម្មនាវាផ្ដល់ជំនួយ Global Sumud Flotilla បានឲ្យដឹងនៅក្នុងសេចក្តីថ្លែងការណ៍មួយថា៖ «យើងបានសាកល្បងធ្វើដំណើរតាមសមុទ្រ ហើយបន្ទាប់មក ត្រលប់ទៅកំពង់ផែវិញ ដើម្បីឲ្យខ្យល់ព្យុះបោកបក់ទៅផុតសិន។ នេះមានន័យថា ការចាកចេញរបស់យើងត្រូវបានពន្យារពេល ដើម្បីចៀសវាងហានិភ័យដែលនាំឲ្យមានផលវិបាកដោយសារទូកតូចៗ»។ 

សេចក្ដីថ្លែងការណ៍បានបន្ថែមថា ខ្យល់បក់បោក មានល្បឿនប្រហែល ៣៥ម៉ាយល៍ ក្នុងមួយម៉ោង (៥៦គីឡូម៉ែត្រក្នុងមួយម៉ោង)។ អ្នករៀបចំមិនបានបញ្ជាក់ឲ្យដឹងថា តើពេលណាពួកគេគ្រោងនឹងចាប់ផ្ដើមការធ្វើដំណើរឡើងវិញនោះទេ។

សកម្មជនជាច្រើនរូប ក្នុងនោះរួមមានទាំងតារាសម្តែងភាពយន្តរឿង Game of Thrones គឺលោក Liam Cunningham ស្ថិតនៅលើក្រុមនៃទូកជំនួយជាច្រើនដែលមានបំណងបំបែកការរារាំងពីកងទ័ពជើងទឹករបស់អ៊ីស្រាអែល ហើយចែកចាយស្បៀងអាហារ និងការផ្គត់ផ្គង់មនុស្សធម៌ទៅកាន់តំបន់ដែលត្រូវបានបំផ្លិចបំផ្លាញដោយសង្គ្រាមរបស់អ៊ីស្រាអែលអស់រយៈជិត ២ឆ្នាំ៕