កូរ៉េខាងត្បូង និងសហរដ្ឋអាមេរិក មានការខ្វែងគំនិតគ្នាយ៉ាងខ្លាំង ជុំវិញព័ត៌មានលម្អិតនៃមូលនិធិចំនួន ៣៥០ ពាន់លានដុល្លារ ដែលបានព្រមព្រៀងគ្នា ជាផ្នែកនៃកិច្ចព្រមព្រៀងពាណិជ្ជកម្ម នៅមុនមានជំនួបកំពូល កាលពីថ្ងៃទី២៥ ខែសីហា រវាងប្រធានាធិបតីអាមេរិក លោក Donald Trump និងប្រធានាធិបតីកូរ៉េខាងត្បូង លោក Lee Jae Myung។ នេះបើតាមការឲ្យដឹងពីមន្ត្រីជាន់ខ្ពស់ នៅទីក្រុងសេអ៊ូល នាថ្ងៃចន្ទ (ទី១ ខែកញ្ញា) នេះ។

ទីប្រឹក្សាគោលនយោបាយរបស់ប្រធានាធិបតី លោក Kim Yong-beom បាននិយាយថា សហរដ្ឋអាមេរិកបានព្យាយាមប្រើប្រាស់កិច្ចប្រជុំកំពូលនេះ ដើម្បីដាក់សម្ពាធលើទីក្រុងសេអ៊ូលឲ្យផ្ដល់ឯកសារ ស្តីពីព័ត៌មានលម្អិតនៃការវិនិយោគ ជាវិធានការមួយដែលបានទាក់ទាញការជំទាស់តវ៉ា ពីមន្ត្រីទីក្រុងសេអ៊ូល និងបង្កឲ្យមានក្ដីបារម្ភ អំពីលទ្ធផលនៃជំនួបកំពូលនោះ។

ក្នុងអំឡុងពេលមានសម្ភាសន៍ផ្សាយផ្ទាល់នៅឆាណែល YouTube លោក Kim បាននិយាយថា៖ «មានពេលជជែកគ្នាយ៉ាងតានតឹង ដូចជាការស្រែក»។ លោកហាក់ដូចជាកំពុងសំដៅលើការជជែកតាមទូរសព្ទ ក្នុងសន្និសីទរយៈពេល ២ម៉ោង ដែលលោក និងមន្ត្រីកូរ៉េផ្សេងទៀត បានជួបជាមួយរដ្ឋមន្ត្រីក្រសួងពាណិជ្ជកម្មអាមេរិក Howard Lutnick នៅមុនថ្ងៃមានកិច្ចប្រជុំកំពូល។

លោកបានបញ្ជាក់ថា ការជជែកតាមទូរសព្ទនេះ គឺនៅចំណុច «ដ៏តានតឹង» មួយ ហើយលោកមានក្ដីបារម្ភថា លោកនឹង «បង្កជាបញ្ហាដល់ជំនួបកំពូល»។ លោកបានបន្ថែមថា ជាឧទាហរណ៍ ភាគីទាំង២ មានការខ្វែងគំនិតគ្នា ជុំវិញរចនាសម្ព័ន្ធមូលនិធិ។ កូរ៉េខាងត្បូង បានឲ្យដឹងថា ការវិនិយោគផ្ទាល់ នឹងបង្កើតបាននូវចំណែកតូចមួយនៃការវិនិយោគ ដែលខ្លួនបាននិយាយថា ភាគច្រើននឹងមានប្រាក់កម្ចី និងការធានា។

តែយ៉ាងណាក្ដី បើទោះបីជាភាគីទាំង ២ នៅតែមានការយល់ឃើញខុសគ្នាឆ្ងាយ ជុំវិញបញ្ហានេះក៏ដោយ ក៏លោក Kim បានសង្កត់ធ្ងន់ថា វាគឺជាកិច្ចប្រជុំកំពូលប្រកបដោយជោគជ័យ ដែលជួយបង្កើតទំនាក់ទំនងផ្ទាល់ខ្លួន និងការជឿទុកចិត្ត រវាងមេដឹកនាំទាំង២៕