​វាយ​កូន​បាល់​៖ ​កីឡាការិនី​វាយ​កូន​បាល់​លេខ ១ ពិភពលោក Ashleigh Barty បាន​បន្តដំណើរ​បំពេញ​ក្តី​ស្រមៃ​ចង់​ឈ្នះ​ជើងឯក Grand Slam, Australian Open ជា​លើកដំបូង​ក្រោយ​យកឈ្នះ​កីឡាការិនី​អាមេរិក Amanda Anisimova ឡើង​វគ្គ ៨នាក់​ចុងក្រោយ​។ ​​កីឡា​ការិនី​វ័យ ២៥ឆ្នាំ Ashleigh Barty នៅ​មិនទាន់​ចាញ់សូម្បី​មួយ​សិត​នៅឡើយ​នៅ Australian Open ឆ្នាំនេះ​បន្ទាប់ពី​ឈ្នះ Anisimova ដោយ​លទ្ធផល ៦-៤ និង ៦-៣​។

​Amanda Anisimova ឡើងមក​ដល់​វគ្គ​នេះ​បន្ទាប់ពី​យកឈ្នះ​កីឡាការិនី​ជប៉ុន Naomi Osaka​។​ ​ម្ចាស់​ជើងឯក Wimbledon, Ashleigh Barty កំពុង​ចង់​ក្លាយជា​កីឡាការិនី​អូស្ត្រាលី​ទីមួយ​ក្នុង​រយៈពេល ៤៤ឆ្នាំ​ដែល​ឈ្នះ​ជើ​ងឯក Australian Open លើ​ទឹកដី​ខ្លួនឯង​បន្ទាប់ពី​កីឡាការិនី Chris O’Neil ដែល​ឈ្នះ​ជើងឯក​ចុងក្រោយ​បំផុត​តាំងពី​ឆ្នាំ១៩៧៨​។ ​Barty នឹងត្រូវ​ជួប​ជាមួយ​កីឡាការិនី​អាមេរិក​មួយរូប​ទៀត​នៅ​វគ្គ ៨នាក់​ចុងក្រោយ​គឺ​កីឡាការិនី Jessica Pegula​ ដែល​បាន​ទំលាក់​កីឡាការិ​នី​ក្រិ​ក Maria Sakkari​។ ​​Jessica Pegula ដែលមាន​លំដាប់​លេខ ២១ បាន​យកឈ្នះ Maria Sakkari លទ្ធផល ៧-៦(៧-០) និង ៦-៣​។​

ជាមួយគ្នា​នោះដែរ​កីឡាការិនី​បេឡា​រុស Victoria Azarenka បាន​ធ្លាក់​ត្រឹម​វគ្គ ១៦​នាក់​ចុង​ក្រោយ​បន្ទាប់ពី​បរាជ័យ​ក្រោម​ស្នាដៃ​កីឡា​ការិនី​បារាំង Barbora Krejcikova លទ្ធផល ៦-២ និង ៦-២​។ ​រំលឹក​ថា Victoria Azarenka ធ្លាប់​ឈ្នះ​ជើងឯក​នៅ Australian Open ពីរលើក​នៅ​ឆ្នាំ​២០១២ និង ២០១៣​។ ​ដោយឡែក​លទ្ធផល​ផ្សេងទៀត​នៃ​ផ្នែក​នារី​នេះ​ផងដែរ​កីឡាការិនី​អាមេរិក Madison Keys បន្តដំណើរ​ទៅ​វគ្គ ៨នាក់​ចុងក្រោយ​ផងដែរ​ ក្រោយ​យកឈ្នះ​កីឡាការិនី​អេ​ស្ប៉ា​ញ​លំដាប់​លេខ ៨ Paula Badosa ដើម្បី​បន្តដំណើរ​ជួប​ជាមួយ​កីឡាការិនី Barbora Krejcikova៕

​អត្ថបទ​៖​នាង សុភា​វុ​ធ