យោងតាមទិន្នន័យបឋមរបស់ការិយាល័យជំរឿនអាមេរិក ដែលវិភាគដោយមជ្ឈមណ្ឌលស្រាវជ្រាវ Pew បានបង្ហាញកាលពីថ្ងៃចន្ទ (១ កញ្ញា) ថា ជនអន្តោប្រវេសន៍ជាង ១,២លាននាក់ បានបាត់ចេញពីកម្លាំងពលកម្មរបស់សហរដ្ឋអាមេរិក ចាប់ពីខែមករា រហូតដល់ចុងខែកក្កដា ក្នុងនោះមានទាំងអ្នកដែលនៅក្នុងប្រទេសដោយខុសច្បាប់ និងស្របច្បាប់។

នៅថ្ងៃចន្ទ ដែលជាទិវាពលកម្មសហរដ្ឋអាមេរិក បានមើលលឃើញក្បួនដង្ហែ និងព្រឹត្តិការណ៍ផ្សេងទៀត ត្រូវប្រារព្ធឡើងទូទាំងប្រទេស ហើយក្រុមអ្នកជំនាញព្រមានថា គោលនយោបាយអន្តោប្រវេសន៍របស់លោកប្រធានាធិបតី Donald Trump កំពុងជះឥទ្ធិពលដល់កម្លាំងពលកម្មរបស់ប្រទេស។

លោកស្រី Stephanie Kramer អ្នកស្រាវជ្រាវជាន់ខ្ពស់របស់ស្ថាប័ន Pew បានលើកឡើងថា ជនអន្តោប្រវេសន៍បង្កើតបានស្ទើរតែ ២០% នៃកម្លាំងពលកម្មសរុបរបស់អាមេរិក ហើយទិន្នន័យបង្ហាញថា អត្រា ៤៥% នៃកម្មករក្នុងវិស័យកសិកម្ម នេសាទ និងព្រៃឈើ គឺជាជនអន្តោប្រវេសន៍។ លោកស្រីបន្ថែមថា ប្រហែល ៣០% នៃកម្មករសំណង់ទាំងអស់សុទ្ធតែជាជនអន្តោប្រវេសន៍ ហើយ ២៤% នៃបុគ្គលិកសេវាកម្មក៏ជាជនអន្តោប្រវេសន៍ផងដែរ។

ការបាត់បង់ពលករអន្តោប្រវេសន៍ច្រើនបែបនេះ កើតឡើងនៅពេលប្រជាជាតិអាមេរិក កំពុងមើលឃើញការថយចុះជាលើកដំបូងនៃចំនួនប្រជាជនអន្តោប្រវេសន៍សរុប បន្ទាប់ពីតួលេខអ្នកដែលរស់នៅដោយខុសច្បាប់នៅអាមេរិក បានឈានដល់កម្រិតខ្ពស់បំផុតនៃចំនួន ១៤លាននាក់ ក្នុងឆ្នាំ២០២៣៕