សមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ គឺប្រទេសចិន និងរុស្ស៊ី កាលពីថ្ងៃចន្ទ (១ កញ្ញា) បានសម្ដែងការគាំទ្រដល់អ៊ីរ៉ង់ ដោយច្រានចោលចំណាត់ការរបស់មហាអំណាចអ៊ឺរ៉ុប ជុំវិញការដាក់ទណ្ឌកម្មរបស់អង្គការសហប្រជាជាតិ ឡើងវិញលើទីក្រុងតេអេរ៉ង់ ខណៈកិច្ចព្រមព្រៀងនុយក្លេអ៊ែរជួបភាពមិនច្បាស់លាស់។

លិខិតរួមមួយដែលចុះហត្ថលេខាដោយរដ្ឋមន្ត្រីការបរទេសចិន រុស្ស៊ី និងអ៊ីរ៉ង់ បាននិយាយថា ចំណាត់ការរបស់អឺរ៉ុបទាំងបី គឺអង់គ្លេស បារាំង និងអាល្លឺម៉ង់ ក្នុងការស្តារឡើងវិញដោយស្វ័យប្រវត្តិនូវទណ្ឌកម្ម ក្រោមអ្វីដែលហៅថា "យន្តការត្រឡប់ទៅស្ថានភាពដើម" នោះជា "កំហុសផ្លូវច្បាប់ និងនីតិវិធី"។

ចិន និងរុស្ស៊ី ជាប្រទេសហត្ថលេខីនៃកិច្ចព្រមព្រៀងនុយក្លេអ៊ែរឆ្នាំ២០១៥ ដែលជិតអស់សុពលភាពនៅខែតុលាខាងមុខ របស់អ៊ីរ៉ង់ ជាមួយមហាអំណាចពិភពលោក រួមនឹងអឺរ៉ុបទាំងបី ដែលគេស្គាល់ថា E3។ ប្រធានាធិបតីអាមេរិក លោក Donald Trump បានដកសហរដ្ឋអាមេរិក ចេញពីកិច្ចព្រមព្រៀងនោះ ក្នុងអាណត្តិដំបូងនៅឆ្នាំ២០១៨។

អឺរ៉ុបទាំងបី បានបើកដំណើរការ "យន្តការត្រឡប់ទៅស្ថានភាពដើមវិញ" កាលពីសប្តាហ៍មុន ដោយចោទអ៊ីរ៉ង់ ថារំលោភលើកិច្ចព្រមព្រៀងនុយក្លេអ៊ែរឆ្នាំ២០១៥ ដែលបានផ្តល់ការធូរស្រាលពីទណ្ឌកម្មហិរញ្ញវត្ថុអន្តរជាតិ ជាថ្នូរនឹងការទប់ស្កាត់កម្មវិធីនុយក្លេអ៊ែររបស់ទីក្រុងតេអេរ៉ង់។ អ៊ីរ៉ង់ និង E3 ក៏បានបើកកិច្ចពិភាក្សាក្នុងបំណងស្វែងរកកិច្ចព្រមព្រៀងនុយក្លេអ៊ែរថ្មី ប៉ុន្តែពុំទាន់មានលទ្ធផលអ្វីទេ៕