ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្តីទី បានណែនាំ​ទៅ​ឯក​អគ្គ​រាជ​ទូត​នៃព្រះរាជាណាចក្រកម្ពុជា ចំនួន៨ប្រទេស ត្រូវខិតខំបង្ហាញនូវសក្ដានុពល នៃប្រទេសខ្មែរ ទៅ​កាន់បរទេស ជាពិសេសថ្នាក់ដឹកនាំ និងអ្នកវិនិយោគ នៃប្រទេសទាំងនោះ ដើម្បីឲ្យ​ពួក​គេ​ចាប់​អារម្មណ៍ ហើយមកធ្វើការវិនិយោគនៅកម្ពុជាកាន់តែច្រើន និងជំរុញកំណើនសេដ្ឋកិច្ចជាតិ។

ទូតទាំង៨ប្រទេសនោះ រួមមានឯកឧត្តម ឃួន ផុនរតនៈ ជាឯកអគ្គរាជទូតវិសាមញ្ញ និង​ពេញ​សមត្ថ​ភាព​ប្រចាំសាធារណរដ្ឋកូរ៉េ និងឯកឧត្តម សោម វិសាល ឯកអគ្គរាជទូតវិសាមញ្ញ និង​ពេញ​សមត្ថភាព ប្រចាំសាធារណរដ្ឋអារ៉ាប់អេហ្ស៊ីប, ប្រទេសអារ៉ាប់ប៊ីសាអូឌីត, ព្រះរាជាណាចក្រម៉ារ៉ុក, សាធារណ​រដ្ឋប្រជាធិបតេយ្យប្រជាមានិតអាល់ហ្សេរី, សាធារណរដ្ឋប្រជាធិបតេយ្យ​សហព័ន្ធ​អេត្យូពី, សហភាពអាហ្វ្រិក និងប្រទេសអូម៉ង់ ដែលមាននិវេសនដ្ឋាន នៅទីក្រុងគែរ សាធារណ​រដ្ឋ​អារ៉ា​ប់​អេហ្ស៊ីប ។

ក្នុងជំនួបជំរាបលា ទៅបំពេញបេសកកម្ម នៃទូតខ្មែរប្រចាំប្រទេសទាំង៨ នៅថ្ងៃទី២ ខែកញ្ញា ឆ្នាំ២០២៥ ឯកឧត្តមកិត្តិសេដ្ឋាបណ្ឌិត មានប្រសាសន៍ថា ជាការពិតណាស់ ការ​តែង​តាំង​នេះ​ពិត​ជា​ទំនួល​ខុសត្រូវដ៏ធំមួយ និងមានសារៈសំខាន់ណាស់ សម្រាប់កម្ពុជា ព្រោះ​យើង​ត្រូវ​លើក​កម្ពស់​ផល​ប្រយោជន៍ជាតិ ការការពារឯករាជ្យភាព អធិបតេយ្យភាព និងបូរណភាពទឹកដី ព្រម​ទាំង​ពង្រឹង​សន្តិភាព និងកិច្ចសហប្រតិបត្តិការ និងផលប្រយោជន៍សេដ្ឋកិច្ចជាតិ ហើយក្នុង​តួនាទី​ភារកិច្ច​នេះ ពិតជាមានសារៈសំខាន់ខ្លាំងណាស់ ក្នុងការលើកកម្ពស់អត្តសញ្ញាណវប្បធម៌ជាតិ និង​លើកកម្ពស់មុខមាត់ និងកិត្យានុភាពជាតិលើឆាកអន្តរជាតិ ។  

ជាមួយនេះ ឯកឧត្តមប្រធានរដ្ឋសភាស្តីទី បានជំរុញដកើទូតប្រចាំប្រទេសទាំង៨ ត្រូវមាន​តួនាទី​ពហុវិស័យ ដូចជាការទូតនយោបាយ ការទូតសភា ការទូតសេដ្ឋកិច្ច ការទូតវប្បធម៌ សិល្បៈ សាសនា និងការទូតទេសចរណ៍ជាដើម ដើម្បីឆ្លើយតប​ទៅ​នឹង​គោល​នយោបាយ​របស់​រាជ​រដ្ឋាភិបាល​។

ឯកឧត្តមកិត្តិសេដ្ឋាបណ្ឌិត គូសបញ្ជាក់ថា អង្គទូតត្រូវតែមានភាពឈ្លាសវៃ ប៉ិនប្រសព្វ ក្នុង​ការ​ដឹក​នាំ ត្រូវធ្វើយ៉ាងណាខិតខំពង្រឹង និងពង្រីកទំនាក់ទំនងមិត្តភាព សាមគ្គីភាព និង​សហ​ប្រតិបត្តិ​ការ​ទាំងក្របខណ្ឌទ្វេភាគី និងពហុភាគីឱ្យកាន់តែប្រសើរ និងស្អិតរមួតថែមទៀត ដើម្បី​ផល​ប្រយោជន៍​រួមសម្រាប់ជាតិ ក៏ដូចជាតំបន់ និងសកលលោកផងដែរ ។

ក្នុងឱកាសនោះ ទូតប្រចាំប្រទេសទាំង៨ បានបង្ហាញការប្ដេជ្ញាចិត្ត នៅពេលទៅបំពេញបេសកកម្ម នឹងខិតខំធ្វើយ៉ាងណា ដើម្បីផ្សព្វផ្សាយពីសក្ដានុពល របស់ប្រទេសកម្ពុជា ទៅកាន់ថ្នាក់ដឹកនាំ និងអ្នកវិនិយោគនៃប្រទេសទាំង៨បន្ថែមទៀត ធ្វើយ៉ាងណាផ្ដល់នូវអត្ថប្រយោជន៍ដល់កម្ពុជា ក្នុងនោះមានវិស័យពាណិជ្ជកម្ម-សេដ្ឋកិច្ច វិស័យទេសចរណ៍ និងវប្បធម៌ជាដើម ខណៈដែលកម្ពុជាកំពុងមានសន្តិភាព ស្ថិរភាពនយោបាយល្អ បើទោះបីជាមានជម្លោះព្រំដែនរយៈពេលខ្លី ជាមួយប្រទេសជិតខាង ៕ អត្ថបទ បាន សុខរិទ្ធិ