អង្គភាពនិស្សិត និងក្រុមសិទ្ធិមនុស្សបានអះអាងនៅថ្ងៃអង្គារ (២ កញ្ញា) នេះថា នគរបាលឥណ្ឌូនេស៊ី បានបាញ់ឧស្ម័នបង្ហូរទឹកភ្នែកដាក់លើហ្វូងបាតុករ នៅជិតសាកលវិទ្យាល័យចំនួនពីរកន្លែងនៅទីក្រុង Bandung ដោយបានបន្ថែមកម្ដៅដ៏តានតឹងជាថ្មីដល់ការតវ៉ាយ៉ាងកម្រោល ដែលបង្កការស្លាប់ និងបាត់ខ្លួនជាច្រើននាក់ និងធ្វើឱ្យកក្រើកប្រទេស ចាប់តាំងពីសប្តាហ៍មុនមក។

ការតវ៉ាបានចាប់ផ្តើមដំបូងកាលពីមួយសប្តាហ៍មុនក្នុងទីក្រុងហ្សាការតា រដ្ឋធានីឥណ្ឌូនេស៊ី ដោយផ្តោតលើការចំណាយរបស់រដ្ឋាភិបាល ដូចជាអត្ថប្រយោជន៍សម្រាប់សមាជិកសភាជាដើម ហើយបាតុកម្មបានកើនឡើងទូទាំងប្រទេស ជាមួយនឹងកុបកម្ម ហិង្សា និងការលួចប្លន់មួយចំនួន បន្ទាប់ពីរថយន្តរបស់នគរបាលបានបុកសម្លាប់អ្នករត់ម៉ូតូឌុបម្នាក់។

ស្ថាប័ននិស្សិតនៃសាកលវិទ្យាល័យអ៊ិស្លាម Bandung ដែលត្រូវស្គាល់ក្នុងស្រុកថា UNISBA និងសាកលវិទ្យាល័យ Pasundan ដែលនៅជិតខាង មានចម្ងាយជាង ១៤០គីឡូម៉ែត្រ ភាគខាងលិចទីក្រុងហ្សាការតា បាននិយាយលើបណ្ដាញសង្គម Instagram ថា អាជ្ញាធរបានបាញ់ឧស្ម័នបង្ហូរទឹកភ្នែកលើហ្វូងមនុស្សនៅក្បែរបរិវេណសាលាក្នុងបាតុកម្មកាលពីល្ងាចថ្ងៃចន្ទ។

មន្ត្រីនគរបាលក្នុងតំបន់និយាយថា អាជ្ញាធរមិនបានចូលក្នុងបរិវេណសាលាទេ ប៉ុន្តែនៅពេលនោះ បានព្យាយាមបំបែកក្រុមអ្នកតវ៉ាមិនមែនជានិស្សិត ដែលចង់សម្រុកចូលក្នុងបរិវេណសាកលវិទ្យាល័យ។ យ៉ាងណាក៏ដោយ ស្ថាប័ននិស្សិត UNISBA អះអាងថា កងកម្លាំងសន្តិសុខ "បានវាយប្រហារយ៉ាងព្រៃផ្សៃ" ក្នុងបរិវេណសាលា ដោយបន្ថែមថា ឧស្ម័នបង្ហូរទឹកភ្នែកបានប៉ះពាល់សុខភាពសិស្សមួយចំនួន ហើយចោទកងកម្លាំងសន្តិសុខថាកំពុងព្យាយាមបំបិទមាត់បាតុករ៕