ទីភ្នាក់ងារថាមពលអាតូមិកអន្តរជាតិ IAEA បាននិយាយក្នុងរបាយការណ៍មួយទៅកាន់រដ្ឋជាសមាជិកកាលពីថ្ងៃចន្ទ (១ កញ្ញា) ថា អង្គការឃ្លាំមើលនុយក្លេអ៊ែររបស់អង្គការសហប្រជាជាតិមួយនេះ បានរកឃើញដាននៃសារធាតុអ៊ុយរ៉ានីញ៉ូម នៅប្រទេសស៊ីរី ក្នុងការស៊ើបអង្កេតរបស់ខ្លួនលើអគារមួយខ្នង ដែលអ៊ីស្រាអែលបានទម្លាក់គ្រាប់បែកកម្ទេចចោលក្នុងឆ្នាំ២០០៧ ខណៈ IAEA ជឿជាក់យូរមកហើយថា ទីតាំងនោះប្រហែលជាម៉ាស៊ីនរ៉េអាក់ទ័រនុយក្លេអ៊ែរដែលមិនបានប្រកាស។

រដ្ឋាភិបាលរបស់អតីតមេដឹកនាំស៊ីរី លោក Bashar al-Assad ដែលត្រូវបានផ្ដួលរំលំ ធ្លាប់អះអាងថា ទីតាំង Deir al-Zor ដែលរួមបញ្ចូលអគារមួយខ្នងនោះ គ្រាន់តែជាមូលដ្ឋានយោធាធម្មតាប៉ុណ្ណោះ។ កាលពីឆ្នាំ២០១១ ទីភ្នាក់ងារ IAEA បានសន្និដ្ឋានបឋមថា អគារនេះ "ទំនងជា" មានម៉ាស៊ីនរ៉េអាក់ទ័រសាងសង់ដោយសម្ងាត់ ដែលទីក្រុងដាម៉ាស មិនប្រកាសប្រាប់អង្គភាពឃ្លាំមើលនុយក្លេអ៊ែរឱ្យបានដឹង។

របាយការណ៍សម្ងាត់កាលពីថ្ងៃចន្ទ ដែលមើលឃើញដោយសារព័ត៌មានរ៉យទ័របានឱ្យដឹងថា ចាប់តាំងឆ្នាំ២០១១នោះមក IAEA បានព្យាយាមឈានដល់ការសន្និដ្ឋានច្បាស់លាស់ ហើយក្រោមការជំរុញជាថ្មីកាលពីឆ្នាំមុន ខ្លួនអាចយកសំណាកបរិស្ថាននៅទីតាំងមិនបញ្ចេញឈ្មោះ ៣កន្លែង "ដែលសង្ស័យថាពាក់ព័ន្ធនឹង" ដំណើរការនៅទីតាំង Deir al-Zor។

របាយការណ៍បន្តថា ទីភ្នាក់ងារនេះបានរកឃើញ «ចំនួនដ៏ច្រើននៃភាគល្អិតអ៊ុយរ៉ានីញ៉ូមធម្មជាតិ ក្នុងគំរូសំណាក ពីទីតាំងមួយក្នុងចំណោមទីតាំងទាំងបី»។ សូមបញ្ជាក់ថា ពាក្យ «ធម្មជាតិ» បង្ហាញថា សារធាតុអ៊ុយរ៉ានីញ៉ូមនោះមិនត្រូវបានចម្រាញ់ទេ ហើយរបាយការណ៍ក៏មិនសន្និដ្ឋានឱ្យច្បាស់ដែរថា តើដានសារធាតុនុយក្លេអ៊ែរដែលរកឃើញនេះមានន័យយ៉ាងណា៕