មន្ត្រីជាន់ខ្ពស់ម្នាក់របស់ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បាននិយាយកាលពីថ្ងៃចន្ទថា ចាប់តាំងពីការដួលរលំនៃរដ្ឋាភិបាលរបស់លោក បាសា អាល់អាសាដ (Bashar al-Assad) ក្នុងខែធ្នូ ជនភៀសខ្លួនស៊ីរីប្រមាណ ៨៥០.០០០នាក់ បានវិលត្រឡប់មកពីប្រទេសជិតខាងវិញ ហើយតួលេខនេះ អាចឡើងដល់ ១លាននាក់ ក្នុងប៉ុន្មានសប្តាហ៍ខាងមុខ។

ឧត្តមស្នងការរងនៃ UNHCR លោកស្រី Kelly T. Clements បានប្រាប់សារព័ត៌មាន AP ក្នុងទីក្រុង ដាម៉ាស (Damascus) ថា មនុស្សប្រហែល ១,៧ លាននាក់ ដែលត្រូវបានជម្លៀសនៅក្នុងប្រទេសនេះ ក្នុងក្នុងអំឡុងពេលជម្លោះ ១៤ឆ្នាំ បានត្រឡប់ទៅសហគមន៍របស់ពួកគេវិញ ខណៈដែលរដ្ឋាភិបាលកណ្តាលបណ្តោះអាសន្នបច្ចុប្បន្នគ្រប់គ្រងផ្នែកធំៗនៃប្រទេសស៊ីរី។

លោកស្រី Clements ដែលបាននៅក្នុងប្រទេសស៊ីរី រយៈពេលបីថ្ងៃ បាននិយាយថា៖«នេះគឺជារយៈពេលដ៏សំខាន់។ វាជាឱកាសមួយដែលយើងអាចមើលឃើញដំណោះស្រាយដ៏មានសក្ដានុពលសម្រាប់ការផ្លាស់ទីលំនៅជាសាកលដ៏ធំបំផុត ដែលយើងបានឃើញក្នុងរយៈពេល ១៤ឆ្នាំ ចុងក្រោយនេះ»។

ជម្លោះស៊ីរីដែលបានចាប់ផ្តើមក្នុងខែមីនា ឆ្នាំ ២០១១ បានសម្លាប់មនុស្សជិតកន្លះលាននាក់ និងបានផ្លាស់ទីលំនៅពាក់កណ្តាលនៃប្រជាជនមុនសង្គ្រាមរបស់ប្រទេសនេះចំនួន ២៣លាននាក់។ ប្រជាជនស៊ីរីជាង ៥លាននាក់ បានភៀសខ្លួនចេញពីប្រទេស ជាជនភៀសខ្លួន ដែលភាគច្រើនពួកគេទៅកាន់ប្រទេសជិតខាង។

លោកស្រី Clements បាននិយាយថា មនុស្សគ្រប់រូបមានហេតុផលផ្សេងគ្នាសម្រាប់ការត្រឡប់មកវិញ នៅពេលនេះ ខណៈពេលដែលអ្នកខ្លះ កំពុងពន្យារពេល និងរង់ចាំមើលថាតើអ្វីៗគ្រប់យ៉ាងដំណើរការទៅជាយ៉ាងណា។

ជាផ្នែកនៃដំណើរទស្សនកិច្ចរបស់ខ្លួន លោកស្រី បានទៅកាន់ច្រកព្រំដែនជាមួយប្រទេសលីបង់ ជាកន្លែងដែលលោកបានអះអាងថា លោកស្រីបានឃើញរថយន្តដឹកទំនិញជាច្រើនជួរ និងមនុស្សរង់ចាំធ្វើដំណើរ ត្រឡប់ទៅប្រទេសស៊ីរីវិញ៕