នគរបាលក្រុងឡុងដ៍ បាននិយាយកាលពីថ្ងៃចន្ទថា ខ្លួនបានចោទប្រកាន់មនុស្ស ៤៧នាក់ផ្សេងទៀតពី0បទគាំទ្រសកម្មភាពប៉ាឡេស្ទីន ដែលនាំឲ្យចំនួនសកម្មជនដែលត្រូវបានចោទប្រកាន់ថា បានគាំទ្រក្រុម «ភេរវករ» ដែលត្រូវបានហាមឃាត់ កើនឡើងដល់ ១១៤នាក់។

នគរបាលក្រុង បាននិយាយនៅក្នុងសេចក្តីថ្លែងការណ៍មួយថា ជនជាប់ចោទដែលមានអាយុចន្លោះពី ១៨ ដល់ ៨១ ឆ្នាំ នឹងបង្ហាញខ្លួននៅក្នុងតុលាការ នៅថ្ងៃទី ២៧ និង ២៨ ខែតុលា ហើយអាចប្រឈមមុខនឹងការផ្តន្ទាទោសដាក់ពន្ធនាគាររយៈពេល ៦ ខែ ប្រសិនបើត្រូវបានរកឃើញថា មានកំហុស។

រដ្ឋាភិបាលចក្រភពអង់គ្លេស បានកំណត់សកម្មភាពប៉ាឡេស្ទីនជាក្រុមភេរវករ ក្នុងខែកក្កដា បន្ទាប់ពីយន្តហោះពីរគ្រឿង ត្រូវបានបំផ្លិចបំផ្លាញនៅមូលដ្ឋានទ័ពអាកាសភូមិន្ទ (RAF) ដែលបានបណ្តាលឲ្យខូចខាតប្រហែល ៧ លានផោន (៩,៣លានដុល្លារ)។

ក្រុមសិទ្ធិមនុស្ស និងអ្នកជំនាញរបស់អង្គការសហប្រជាជាតិ បានថ្កោលទោសការហាមឃាត់នេះថា ជាការបំពានផ្លូវច្បាប់ និងការគំរាមកំហែងដល់ការបញ្ចេញមតិដោយសេរី ហើយការតវ៉ាជាច្រើន ត្រូវបានធ្វើឡើង នៅទីក្រុងឡុងដ៍ ដើម្បីប្រកាសបដិសេធការសម្រេចនេះ។

មនុស្សជាង ៧០០នាក់ ត្រូវបានចាប់ខ្លួន ដែលភាគច្រើននៅក្នុងបាតុកម្ម ចាប់តាំងពីក្រុមនេះ ត្រូវបានហាមឃាត់ នៅក្រោមច្បាប់ភេរវកម្មឆ្នាំ ២០០០។ សរុបចំនួន១១៤នាក់នៃអ្នកដែលត្រូវឃាត់ឃុំខ្លួន ត្រូវបានចោទប្រកាន់៕