លោក Hardeep Singh Puri រដ្ឋមន្ត្រីប្រេង និងឧស្ម័នរបស់ប្រទេសនេះ បានសរសេរនៅក្នុងអត្ថបទមួយចុះផ្សាយដោយសារព័ត៌មាន The Hindu ថា ការរិះគន់របស់លោកខាងលិចជុំវិញការទិញប្រេងពីរុស្ស៊ីនេះ គឺគ្មានមូលដ្ឋាន។

លោកបាននិយាយថា៖«អ្នករិះគន់មួយចំនួន បានចោទថា ឥណ្ឌាបានក្លាយជា«គម្រោងសម្អាតសាច់ប្រាក់»សម្រាប់ប្រេងរុស្ស៊ី។ គ្មានអ្វីអាចលើសពីការពិតបានទេ»។

លោកបានបន្ថែមថា៖«ការពិតធំជាងនេះ គឺពុំមានជម្រើសសម្រាប់ប្រទេសផលិតធំបំផុតទី២របស់ពិភពលោក ដែលផ្គត់ផ្គង់ជិត ១០% នៃប្រេងពិភពលោកនោះទេ»។

លោករដ្ឋមន្ត្រី បានកត់សម្គាល់ថា៖«ប្រេងរបស់រុស្ស៊ី មិនដែលត្រូវបានដាក់ទណ្ឌកម្មដូចប្រេងឆៅរបស់អ៊ីរ៉ង់ ឬវ៉េណេហ្ស៊ុយអេឡានោះទេ»។ លោកបានរំលឹកថា បណ្តាប្រទេស G7 និង សហភាពអឺរ៉ុប បានដាក់កម្រិតតម្លៃ និងវិធានការរឹតត្បិតមួយចំនួនលើប្រេងពីរុស្ស៊ី ដែលឥណ្ឌាបានអនុវត្តយ៉ាងពេញលេញ។

លោក Puri បានសង្កត់ធ្ងន់ថា រាល់ប្រតិបត្តិការប្រេងរបស់ឥណ្ឌា ត្រូវបានធ្វើឡើង ដោយប្រើ«ការដឹកជញ្ជូនស្របច្បាប់ និងការធានារ៉ាប់រង ពាណិជ្ជករដែលមានការព្រមព្រៀង និងបណ្តាញដែលមានការត្រួតពិនិត្យយ៉ាងត្រឹមត្រូវ»។

លោករដ្ឋមន្ត្រី បានបញ្ជាក់ថា៖«ឥណ្ឌាមិនបានបំពានច្បាប់ណាមួយទេ។ ឥណ្ឌាបានរក្សាស្ថិរភាពទីផ្សារ និងរក្សាតម្លៃសកលមិនឲ្យកើនឡើង»៕