មេដឹកនាំកោះតៃវ៉ាន់ លោក Lai Ching-te កាលពីថ្ងៃអង្គារ (ទី២ ខែកញ្ញា) នេះ បាននិយាយថា ការលុកលុយនឹងបរាជ័យដោយចៀសមិនរួច ដោយដើម្បីគាំទ្រដល់សម្ដីរបស់លោក ដែលកើតមាននៅមួយថ្ងៃមុនព្រឹត្តិការណ៍ព្យុហយាត្រាយោធាដ៏ធំ នៅទីក្រុងប៉េកាំង លោកបានចង្អុលបង្ហាញនូវមេរៀនពីសង្គ្រាមលោកលើកទី២ និងជ័យជម្នះសំខាន់ៗដែលកោះតៃវ៉ាន់ទាមទារប្រឆាំងនឹងកងកម្លាំងចិន ក្នុងឆ្នាំ១៩៥៨។

កោះតៃវ៉ាន់ស្វ័យគ្រប់គ្រងដោយលទ្ធិប្រជាធិបតេយ្យ ក្នុងរយៈពេល ៥ឆ្នាំកន្លងមកនេះ បានលើកឡើងម្តងហើយម្តងទៀត អំពីការកើនឡើងនូវសកម្មភាពយោធារបស់ចិន ក្នុងនោះរួមទាំងសមយុទ្ធជុំវិញកោះនេះផងដែរ ខណៈដែលទីក្រុងប៉េកាំងបង្កើនសម្ពាធ ដើម្បីជំរុញដល់ការអះអាងសិទ្ធិដែនដីដែលរដ្ឋបាលនៅទីក្រុងតៃប៉ិបដិសេធ។

ប្រធានាធិបតីចិន លោក Xi Jinping រួមជាមួយប្រធានាធិបតីរុស្ស៊ី លោក Vladimir Putin និងមេដឹកនាំកូរ៉េខាងជើង លោក Kim Jong Un នឹងត្រួតពិនិត្យក្បួនព្យុហយាត្រយោធាទ្រង់ទ្រាយធំ ក្នុងទីក្រុងប៉េកាំងនៅថ្ងៃពុធ ទី៣ ខែកញ្ញា ដើម្បីប្រារព្ធខួបលើកទី៨០ នៃការបញ្ចប់សង្គ្រាមលោកលើកទី២។

អំឡុងពេលនិយាយទៅកាន់មន្ត្រីនៅស្ថាប័នការពារដែនកោះ លោក Lai បានកត់សម្គាល់ថា ថ្ងៃទី២ ខែកញ្ញា គឺជាខួបលើកទី៦៧ នៃសមរភូមិជើងទឹកឆ្នាំ១៩៥៨ កោះតៃវ៉ាន់ប្រារព្ធជាជ័យជម្នះដែលជាផ្នែកមួយនៃការវាយប្រហារថ្ងៃទី២៣ ខែសីហារបស់ចិន លើកោះ Kinmen គ្រប់គ្រងដោយកោះតៃវ៉ាន់ ដែលត្រូវបានគេស្គាល់ជាអន្តរជាតិថា ជាវិបត្តិច្រកសមុទ្រតៃវ៉ាន់ទី២ (Second Taiwan Strait Crisis)។

លោកបានបន្ថែមថា ជ័យជម្នះរបស់កោះតៃវ៉ាន់ នាពេលនោះ បង្ហាញថា សន្តិភាពពិត កើតចេញពីការតាំងចិត្តរួបរួមប្រឆាំងនឹងការលុកលុយ។ លោក Lai បាននិយាយថា៖ «យើងទាំងអស់គ្នាដឹងថា បរិយាកាសសន្តិសុខនាពេលបច្ចុប្បន្ន គឺធ្ងន់ធ្ងរជាងពេលមុនៗ។ ក្នុងប៉ុន្មានឆ្នាំថ្មីៗនេះ ចិនបានបន្តធ្វើសកម្មភាពយ៉ាងខ្លាំង ជាមួយយន្តហោះយោធា និងនាវា នៅជុំវិញច្រកសមុទ្រតៃវ៉ាន់»។ លោកបានបញ្ជាក់ថា៖ «រាប់ចាប់ពីជ័យជម្នះក្នុងសង្គ្រាមលោកលើកទី២ រហូតដល់សមិទ្ធិផលដ៏រុងរឿងនៃសមរភូមិកងទ័ពជើងទឹកថ្ងៃទី២ ខែកញ្ញា និងការបាញ់កាំភ្លើងធំតគ្នាថ្ងៃទី២៣ ខែសីហា មេរៀនដ៏មានតម្លៃបំផុតនៅតែមានដដែល នោះគឺថា ការរួបរួមធានាបាននូវជ័យជម្នះ ខណៈដែលការលុកលុយនឹងបរាជ័យដោយចៀសមិនរួច»៕