ក្រុមសិទ្ធិមនុស្ស នៅថ្ងៃអង្គារ (ទី២ ខែកញ្ញា) នេះ បានប្រាប់ឲ្យដឹងថា មនុស្សយ៉ាងហោចណាស់ ២០នាក់ បានបាត់ខ្លួន បន្ទាប់ពីការតវ៉ាដោយហិង្សា បានផ្ទុះឡើងនៅក្នុងប្រទេសឥណ្ឌូនេស៊ី ដើម្បីជំទាស់នឹងការផ្ដល់អត្ថប្រយោជន៍ដ៏ច្រើនសន្ធឹកសន្ធាប់ដល់សមាជិកសភា ដែលក៏បានប្រែក្លាយផងដែរទៅជាការមានកំហឹង ចំពោះនគរបាល។

មនុស្ស ៦នាក់យ៉ាងតិច បានបាត់បង់ជីវិត ចាប់តាំងពីការតវ៉ា បានធ្វើឲ្យកក្រើកប្រទេសមានសេដ្ឋកិច្ចដ៏ធំបំផុតរបស់តំបន់អាស៊ីអាគ្នេយ៍ កាលពីសប្តាហ៍មុន ដោយហេតុការណ៍កាន់តែអាក្រក់ឡើងៗ បន្ទាប់ពីការចែកចាយនូវរូបភាពវីដេអូដែលបង្ហាញពីអង្គភាពនគរបាលប៉ារ៉ាយោធា បានសម្លាប់អ្នកដឹកជញ្ជូនវ័យក្មេងម្នាក់។

គណៈកម្មការ សម្រាប់មនុស្សបាត់ខ្លួន និងជនរងគ្រោះនៃអំពើហិង្សា (KontraS) បានឲ្យដឹងនៅក្នុងសេចក្តីថ្លែងការណ៍មួយថា៖ «គិតត្រឹមថ្ងៃទី១ ខែកញ្ញា មានរបាយការណ៍ពីការបាត់ខ្លួនមនុស្សចំនួន។ បន្ទាប់ពីដំណើរការស្វែងរក និងផ្ទៀងផ្ទាត់ មនុស្សបាត់ខ្លួនចំនួន ២០នាក់ នៅតែរកមិនទាន់ឃើញ»។

ក្រុមសិទ្ធិមនុស្សនេះ បានបញ្ជាក់ថា មនុស្ស ២០នាក់ ត្រូវបានគេរាយការណ៍ថា បានបាត់ខ្លួនក្នុងទីក្រុង Bandung និង Depok នៅលើកោះ Java និងបណ្ដាទីក្រុងរដ្ឋបាល ដូចជាហ្សាការកណ្ដាល ហ្សាការតាខាងកើត និងហ្សាការតាខាងជើង ដែលបង្កើតជារដ្ឋធានីយ៉ាងធំទូលាយ។

ទីភ្នាក់ងារព័ត៌មានរដ្ឋ Antara បានរាយការណ៍ថា កាលពីថ្ងៃទី១ ខែកញ្ញា អធិការនគរបាលក្រុង លោក Asep Edi Suheri បានប្រាប់អ្នកសារព័ត៌មានថា នគរបាលបានចាប់ខ្លួនមនុស្ស ១.២៤០នាក់ អំឡុងការតវ៉ា នៅទីក្រុងហ្សាការតា ចាប់តាំងពីថ្ងៃទី២៥ ខែសីហាមក។

ភាពចលាចលនេះបានកើតឡើងនៅក្នុងទីក្រុងនានាទូទាំងប្រទេស ដោយបង្ខំឲ្យប្រធានាធិបតី លោក Prabowo Subianto កែប្រែការសម្រេច ដោយលុបចោលការផ្ដល់អត្ថប្រយោជន៍ដល់សមាជិកសភា។ នេះគឺជាការតវ៉ាដ៏អាក្រក់បំផុត ចាប់តាំងពីអតីតឧត្តមសេនីយ៍ឡើងកាន់អំណាចក្នុងឆ្នាំ២០២៤៕