នាយករដ្ឋមន្ត្រីស្លូវ៉ាគីលោក Robert Fico កាលពីថ្ងៃចន្ទ (ទី១ ខែកញ្ញា) បានប្រាប់ឲ្យដឹងថា រូបលោកនឹងជួបពិភាក្សាទ្វេភាគី ជាមួយប្រធានាធិបតីចិន លោក Xi Jinping និងមេដឹកនាំរុស្ស៊ី លោក Vladimir Putin ក្នុងពិធីប្រារព្ធខួបបញ្ចប់សង្គ្រាមលោកលើកទី២ របស់ប្រទេសចិន នៅទីក្រុងប៉េកាំងក្នុងសប្តាហ៍នេះ។

លោក Fico បានបញ្ជាក់នៅក្នុងសេចក្តីថ្លែងការណ៍មួយថា បន្ទាប់មក រូបលោកនឹងជួបជាមួយប្រធានាធិបតីអ៊ុយក្រែន លោក Volodymyr Zelenskyy នៅភាគខាងកើតប្រទេសស្លូវ៉ាគី នាថ្ងៃសុក្រចុងសប្ដាហ៍។

លោក Fico ដែលដឹកនាំប្រទេសជាសមាជិកអង្គការណាតូ (NATO) និងសហភាពអឺរ៉ុប (EU) ប៉ុន្តែបានប្រឆាំងនឹងការដាក់ទណ្ឌកម្មរបស់លោកខាងលិចលើរុស្ស៊ីនោះ មាននូវទំនាក់ទំនងដ៏តានតឹងជាមួយលោក Zelenskyy និងបានបែកបាក់ជាមួយសម្ព័ន្ធមិត្តអឺរ៉ុប។ រូបលោកបានធ្វើដំណើរទៅជួបជាមួយលោក Putin នៅទីក្រុងមូស្គូ កាលពីខែធ្នូឆ្នាំមុន។

ជាមួយគ្នានេះ លោក Fico ក៏នឹងក្លាយជាមេដឹកនាំប្រទេសសហភាពអឺរ៉ុបតែមួយគត់ ដែលទៅចូលរួមក្នុងការប្រារព្ធពិធី នៅទីក្រុងប៉េកាំង ជាកន្លែងដែលលោក Xi នឹងឈររួមជាមួយលោក Putin និងមេដឹកនាំនៃប្រទេសកូរ៉េខាងជើង អ៊ីរ៉ង់ និងមីយ៉ាន់ម៉ា ដើម្បីបង្ហាញពីសាមគ្គីភាពប្រឆាំងនឹងលោកខាងលិចផងដែរ។

លោក Fico បានលើកឡើងនៅក្នុងសេចក្តីថ្លែងការណ៍តាមរយៈអ៊ីម៉ែលថា៖ «ខ្ញុំគោរពរាល់ជនរងគ្រោះទាំងអស់ ដែលប្រយុទ្ធប្រឆាំងនឹងពួកហ្វាស៊ីសនិយម ដូច្នេះហើយ កាលពីអតីតកាល ខ្ញុំបានឈរដោយការគោរព នៅពីមុខវិមានអនុស្សាវរីយ៍ ក្នុងទីក្រុងមូស្គូ ន័រម៉ង់ឌី (Normandy) ឬវ៉ាស៊ីនតោន។ ដោយផ្ទាល់ខ្លួន ខ្ញុំមានការសោកស្ដាយ ហើយខ្ញុំសារភាពថា ខ្ញុំមិនយល់ពីមូលហេតុ ដែលថា ក្នុងចំណោមប្រទេសសហភាពអឺរ៉ុប មានតែស្លូវ៉ាគីមួយប៉ុណ្ណោះ ដែលនឹងមានវត្តមាននៅក្នុងទីក្រុងប៉េកាំង»។

លោកបានសង្កត់ធ្ងន់ថា វាគឺជារឿងចាំបាច់ណាស់ ក្នុងការប្រើឱកាសនេះ ដើម្បីជួបបណ្ដាមេដឹកនាំពិភពលោក ហើយថា លោកបានប្រាប់តំណាងសហភាពអឺរ៉ុប អំពីដំណើរទស្សនកិច្ចរបស់លោក។ យ៉ាងណាក្ដី លោកមិនបានបញ្ជាក់បន្ថែមនោះឡើយ អំពីរបៀបវារៈនៃកិច្ចប្រជុំរបស់លោក នៅទីក្រុងប៉េកាំង និងកិច្ចប្រជុំជាមួយនឹងលោក Zelenskyy៕