ប្រធានាធិបតីវេណេហ្ស៊ុយអេឡា លោក Nicolas Maduro កាលពីថ្ងៃចន្ទ (ទី១ ខែកញ្ញា) បានអះអាងថា នាវាយោធាអាមេរិកចំនួន ៨គ្រឿង «ដែលមានមីស៊ីសល ១.២០០គ្រាប់» កំពុងតម្រង់ទៅប្រទេសរបស់លោក ដោយបានថ្កោលទោសថា នេះគឺជា «ឧក្រិដ្ឋកម្ម និងការគំរាមកំហែងបង្ហូរឈាមទាំងស្រុង»។

សហរដ្ឋអាមេរិកដែលចោទប្រកាន់លោក Maduro ថា ជាមេដឹកនាំក្រុមជួញដូរគ្រឿងញៀន បានប្រកាសដាក់ពង្រាយនាវាចម្បាំងទៅកាន់ភាគខាងត្បូងតំបន់ការ៉ាអ៊ីប ក្នុងប្រតិបត្តិការប្រឆាំងការជួញដូរគ្រឿងញៀន។

នៅឯជំនួបជាមួយប្រព័ន្ធផ្សព្វផ្សាយអន្តរជាតិ ក្នុងទីក្រុងការ៉ាកាស កាលពីថ្ងៃចន្ទ លោក Maduro បាននិយាយថា៖ «យើងប្រឆាំងយ៉ាងខ្លាំងក្លា ចំពោះការគំរាមកំហែងដ៏ធំបំផុតដែលត្រូវបានមើលឃើញ នៅទ្វីបរបស់យើង ក្នុងរយៈពេល ១០០ឆ្នាំចុងក្រោយនេះ។ ទម្រង់នាវាយោធាចំនួន ៨គ្រឿង ដែលមានមីស៊ីលចំនួន ១.២០០គ្រាប់ និងនាវាមុជទឹក ដាក់គោលដៅសំដៅលើប្រទេសវេណេហ្ស៊ុយអេឡា»។

ប្រធានាធិបតីដែលការជាប់បោះឆ្នោតឡើងវិញ ២លើកចុងក្រោយ ក្នុងឆ្នាំ២០២៤ និងឆ្នាំ២០១៨ មិនត្រូវបានទទួលស្គាល់នោះឡើយ ដោយសហរដ្ឋអាមេរិក ឬសហគមន៍អន្តរជាតិភាគច្រើន បានបន្ថែមថា «ដើម្បីឆ្លើយតបទៅនឹងសម្ពាធយោធាអតិបរមា យើងបានប្រកាសពីការត្រៀមខ្លួនជាអតិបរមា ដើម្បីការពារប្រទេសវេណេហ្ស៊ុយអេឡា»។

ទីក្រុងវ៉ាស៊ីនតោនបានបង្កើនប្រាក់រង្វាន់ទ្វេដងដល់ ៥០លានដុល្លារ សម្រាប់ការចាប់ខ្លួនលោក Maduro ប៉ុន្តែមិនបានធ្វើការគំរាមកំហែងជាសាធារណៈ ក្នុងការលុកលុយវេណេហ្ស៊ុយអេឡានោះឡើយ។ ទីក្រុងការ៉ាកាសបានឲ្យដឹងថា ខ្លួននឹងល្បាតដែនទឹករបស់ខ្លួន និងប្រមូលផ្តុំសមាជិកកងជីវពលជាង ៤លាននាក់ ដើម្បីឆ្លើយតបទៅនឹង «ការគំរាមកំហែង» របស់សហរដ្ឋអាមេរិក៕