ក្រុមហ៊ុន Gazprom PJSC របស់ប្រទេសរុស្ស៊ី បានចុះហត្ថលេខាលើកិច្ចព្រមព្រៀងមានចំណងផ្លូវច្បាប់ ដើម្បីសាងសង់បំពង់បង្ហូរឧស្ម័ន Power of Siberia 2 ទៅកាន់ប្រទេសចិន កាត់តាមម៉ុងហ្គោលី ហើយបានយល់ព្រមពង្រីកការចែកចាយតាមរយៈផ្លូវ ២ផ្សេងទៀត។

ដោយដកស្រង់សម្តីរបស់នាយកប្រតិបត្តិ លោក Alexey Miller ដែលបាននិយាយនៅទីក្រុងប៉េកាំង សារព័ត៌មានរុស្ស៊ីបានរាយការណ៍ថា ក្រុមហ៊ុនផលិតឧស្ម័ននេះ កំណត់ថា នឹងបញ្ជូនឲ្យបាន ៥០ពាន់លានម៉ែត្រគូប ក្នុងមួយឆ្នាំ តាមរយៈបំពង់បង្ហូរ Power of Siberia 2 សម្រាប់រយៈពេល ៣០ឆ្នាំ។ យោងតាមសេចក្ដីរាយការណ៍ បានឲ្យដឹងបន្ថែមថា តម្លៃប្រេងឥន្ធនៈនេះ នឹងទាបជាងតម្លៃដែលក្រុមហ៊ុន Gazprom គិតលើអតិថិជននៅអឺរ៉ុបនាពេលបច្ចុប្បន្ន។

តាមរយៈការឈានដល់កិច្ចព្រមព្រៀងមួយ ដើម្បីសាងសង់បំពង់បង្ហូរប្រេងថ្មី ក្រុមហ៊ុន Gazprom មានគោលបំណងពង្រីកតួនាទីរបស់ខ្លួនជាអ្នកផ្គត់ផ្គង់ឧស្ម័នតាមបំពង់ដ៏សំខាន់ដល់ប្រជាជាតិអាស៊ី និងកាត់បន្ថយការចែកចាយផ្នែកខ្លះ នៅអឺរ៉ុប បន្ទាប់ពីមានការលុកលុយនៅអ៊ុយក្រែន។

ជាមួយគ្នានេះ សេចក្ដីរាយការណ៍នេះ បានបន្ថែមថា ក្រុមហ៊ុនផលិតមួយនេះ ក៏បានយល់ព្រមបង្កើនលំហូរទៅកាន់ប្រទេសចិន តាមរយៈបណ្ដាញ Power of Siberia ដែលមានស្រាប់ឲ្យបានចំនួន ៦ពាន់លានម៉ែត្រគូបបន្ថែមទៀត ក្នុងមួយឆ្នាំ។ សមត្ថភាពបញ្ជូនប្រចាំឆ្នាំបច្ចុប្បន្នរបស់បំពង់ទាំងនោះ គឺ ៣៨ពាន់លានម៉ែត្រគូប។

របាយការណ៍នោះបានបញ្ជាក់ថា លំហូរតាមរយៈបណ្តាញភ្ជាប់ចុងបូព៌ានាពេលអនាគតទៅកាន់ប្រទេសចិន ដែលគ្រោងនឹងចាប់ផ្តើមនៅឆ្នាំ២០២៧ ក៏នឹងលើសផងដែរពីការគ្រោងទុកដំបូងចំនួន ១០ពាន់លានម៉ែត្រគូប ក្នុងមួយឆ្នាំ៕