ក្រុមស្តាំនិយមជ្រុលរបស់ប្រទេសបារាំង គឺគណបក្ស National Rally (NR) កាលពីថ្ងៃចន្ទ (ទី១ ខែកញ្ញា) បានប្រាប់ឲ្យដឹងថា ខ្លួនកំពុងរៀបចំត្រៀម សម្រាប់លទ្ធភាពនៃការមានការបោះឆ្នោតមុនអាណត្តិ ដោយបន្ថែមថា កិច្ចប្រឹងប្រែងរបស់នាយករដ្ឋមន្ត្រី លោក Francois Bayrou នៅសប្តាហ៍នេះ ដើម្បីព្យាយាមការពារការដួលរលំនៃរដ្ឋាភិបាលរបស់លោក នឹងបរាជ័យ។

បណ្ដាគណបក្សប្រឆាំង បានបញ្ជាក់ថា ពួកគេនឹងទម្លាក់រដ្ឋាភិបាលសំឡេងភាគតិច នៅក្នុងការបោះឆ្នោតផ្ដល់ទំនុកចិត្តថ្ងៃទី៨ ខែកញ្ញា ជាអ្វីដែលលោក Bayrou បានប្រកាសដោយមិននឹកស្មានដល់កាលពីសប្តាហ៍មុន ខណៈដែលរូបលោកព្យាយាមជំរុញដល់ផែនការដែលមិនសូវមានការគាំទ្រ ដើម្បីកាត់បន្ថយថវិកា នៅឆ្នាំ២០២៦។ លោក Bayrou បានចាប់ផ្តើមកិច្ចចរចាជាបន្តបន្ទាប់កាលពីថ្ងៃចន្ទ ជាមួយបណ្ដាគណបក្សប្រឆាំង ដើម្បីព្យាយាមទប់ស្កាត់ការផ្ដួលរំលំនេះ។

ប្រសិនបើលោក Bayrou មិនទទួលបានជោគជ័យនៅក្នុងការបោះឆ្នោតនាសប្តាហ៍ក្រោយនោះទេ លោកប្រធានាធិបតី Emmanuel Macron អាចតែងតាំងនាយករដ្ឋមន្ត្រីថ្មីភ្លាមៗ ស្នើឲ្យលោក Bayrou បន្តតួនាទីបណ្ដោះអាសន្នមួយរយៈ ឬក៏សម្រេចប្រកាសការបោះឆ្នោតសភាមុនអាណត្តិ។ កាលពីខែមុន មុនពេលលោក Bayrou ប្រកាសពីដំណើរការបោះឆ្នោតផ្ដល់ទំនុកចិត្តរបស់លោក លោក Macron បានច្រានចោលការបោះឆ្នោតមុនកាលកំណត់។

តែយ៉ាងណាក្ដី ប្រមុខគណបក្ស RN លោក Jordan Bardella បាននិយាយកាលពីថ្ងៃចន្ទថា «យើងអាច និងត្រូវតែត្រៀមខ្លួន សម្រាប់គ្រប់យ៉ាង ក្នុងនោះរួមមានទាំងការវិលត្រលប់មកវិញនូវហិបឆ្នោត ដោយសារការរំលាយរដ្ឋសភាផងដែរ»។ លោក Bardella បាននិយាយនៅមុនមានកិច្ចប្រជុំមួយ ដែលធ្វើឡើងក្នុងគោលបំណងរៀបចំគណបក្ស RN សម្រាប់ការបោះឆ្នោតសភា ហើយបានបញ្ជាក់ថា គណបក្សបានដំណើរការជ្រើសរើសបេក្ខជនរួចហើយប្រមាណជា ៨៥ភាគរយ៕