នៅក្នុងសន្និសីទសារព័ត៌មាន ស្ដីពី លទ្ធផលដំណើរទស្សនកិច្ច និងចូលរួមបុណ្យឯករាជ្យជាតិវៀតណាម របស់ សម្ដេចតេជោ ហ៊ុន សែន នាល្ងាចថ្ងៃទី២ ខែកញ្ញា ឆ្នាំ២០២៥ នេះ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា ភាគីទាំងពីរបានជជែកពង្រឹងទំនាក់ទំនងកម្ពុជា វៀតណាមឱ្យកាន់តែស៊ីជម្រៅបន្ថែមទៀត តាមរយៈពាណិជ្ជកម្ម សេដ្ឋកិច្ច ដោយ លោក ផាម មិញជិញ នាយករដ្ឋមន្ត្រីវៀតណាម ចង់ជំរុញការដឹកជញ្ជូនប្រទេសទាំង២ ឈានដល់គោលដៅ ២០ ពាន់លានដុល្លារ។

ឯកឧត្តម ជា ធីរិទ្ធ បញ្ជាក់ថា នាយករដ្ឋមន្ត្រី វៀតណាម បានកត់សម្គាល់ និងបញ្ជាក់ជូនសម្ដេចតេជោថា ធ្វើយ៉ាងណាភាគីទាំង២ ជម្រុញបន្ថែមទៀតដល់ការដឹកជញ្ជូនទំនិញរវាងប្រទេសទាំង២ ឱ្យកាន់តែល្អប្រសើរ ដើម្បីសម្រេចគោលដៅ ផែនការពាណិជ្ជកម្មដែលប្រទេសទាំង២ ចង់បានគឺ ២០ ពាន់លានដុល្លារ ដែលជាចំណុចស្នូលសំខាន់ក្នុងការពង្រីកពាណិជ្ជកម្មរវាងប្រទេសទាំង២ ខណៈភាគីទាំង២ បានសម្រេចគោលដៅ ១០ពាន់លានដុល្លាររួចហើយ។

គួរបញ្ជាក់ថា នៅព្រឹកថ្ងៃទី២ ខែកញ្ញា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានដឹកនាំគណប្រតិភូជាន់ខ្ពស់កម្ពុជា អញ្ជើញចូលរួម ពិធីរំលឹកខួបអនុស្សាវរីយ៍លើកទី៨០ នៃបដិវត្តខែសីហា និងទិវាបុណ្យឯករាជ្យជាតិ វៀត ណាម (២ កញ្ញា ១៩៤៥ - ២ កញ្ញា ២០២៥) ដែលបានប្រារព្ធធ្វើនៅទីលានបាឌិញ ក្នុងរដ្ឋធានីហាណូយ នៃសាធារណរដ្ឋសង្គមនិយមវៀតណាម។ ក្នុងឱកាសបំពេញទស្សនកិច្ចនៅប្រទេសវៀតណាម សម្តេចតេជោ បានពិភាក្សាការងារដាច់ដោយឡែកពីគ្នា ជាមួយថ្នាក់ដឹកនាំវៀតណាម រួមមានលោក តូ ឡឹម អគ្គលេខាធិការបក្សកុម្មុយនីស្តវៀតណាម, លោក ជិន ថាញ់មិន ប្រធានរដ្ឋសភា និងលោក ផាម មិញជិញ នាយករដ្ឋមន្ត្រី៕