អ៊ីស្រាអែល បានចាប់ផ្តើមប្រមូលទាហានបម្រុងរាប់ម៉ឺននាក់នៅថ្ងៃអង្គារនេះ ដែលជាផ្នែកមួយនៃផែនការរបស់ខ្លួន ក្នុងការពង្រីកការវាយលុក នៅក្នុងទីក្រុងហ្កាហ្កា ដែលបង្កឲ្យមានការប្រឆាំងក្នុងស្រុក និងការថ្កោលទោសនៅក្រៅប្រទេស។

ការកេណ្ឌទាហានបម្រុងនៅដើមខែកញ្ញានេះ ដែលបានប្រកាសកាលពីខែមុន បានកើតឡើង នៅពេលដែលកងកម្លាំងជើងគោក និងអាកាស បន្តទៅមុខ និងបន្តគោលដៅបន្ថែមទៀត នៅភាគខាងជើង និង   ភាគកណ្តាលហ្កាហ្សា ដោយវាយលុកផ្នែកខ្លះនៃសង្កាត់ភាគខាងលិចទីក្រុងគឺ Zeitoun និង Shijaiyah ដែលកងកម្លាំងអ៊ីស្រាអែល បានវាយលុកម្តងហើយម្តងទៀត ក្នុងអំឡុងពេលសង្រ្គាម ២៣ខែ ប្រឆាំងនឹងក្រុមសកម្មប្រយុទ្ធហាម៉ាស។

Zeitoun ដែលជាសង្កាត់ដ៏ធំបំផុតរបស់ទីក្រុងហ្កា ដែលមានផ្សារ សាលារៀន និងគ្លិនិក ត្រូវបានផ្លាស់ប្តូរក្នុងរយៈពេលមួយខែកន្លងមកនេះ ដោយផ្លូវនានាទទេស្អាតគ្មានមនុស្សធ្វើដំណើរ ហើយអគារជាច្រើន ត្រូវបានបំផ្លាញទាំងស្រុង ខណៈដែលវាក្លាយជាអ្វីដែលយោធាអ៊ីស្រាអែលកាលពីសប្តាហ៍មុនហៅថា «តំបន់ប្រយុទ្ធដ៏គ្រោះថ្នាក់»។

ទីក្រុងហ្កាហ្សា គឺជាបន្ទាយយោធានិងនយោបាយរបស់ក្រុមហាម៉ាស ហើយយោងទៅតាមអ៊ីស្រាអែល នៅតែជាទីតាំងនៃបណ្តាញផ្លូវរូងក្រោមដីដ៏ធំ បើទោះបីជាមានការលុកលុយច្រើនដង ក្នុងសង្គ្រាមក៏ដោយ។   ទីក្រុងនេះ ក៏ជាកន្លែងភៀសខ្លួនចុងក្រោយបង្អស់មួយ នៅតំបន់ភាគខាងជើង ដែលជនស៊ីវិលរាប់លាននាក់ កំពុងជ្រកកោន ហើយប្រឈមនឹងការគំរាមកំហែងពីរ គឺការប្រយុទ្ធគ្នា និងទុរ្ភិក្ស។