ប្រធានាធិបតីហ្វាំងឡង់ លោក Alexander Stubb នៅថ្ងៃអង្គារ (ទី២ ខែកញ្ញា) នេះ បាននិយាយថា វឌ្ឍនភាពកំពុងកើតមានឡើង ជុំវិញការធានាសន្តិសុខ សម្រាប់អ៊ុយក្រែន ប៉ុន្តែបានបន្ថែមថា កិច្ចព្រមព្រៀងសន្តិភាពនឹងត្រូវបានឈានដល់ជាមុនសិន មុនពេលវិធានការបែបនេះអាចត្រូវបានអនុវត្ត។

លោក Stubb បានប្រាប់អ្នកសារព័ត៌មានថា៖ «យើងត្រូវសម្របសម្រួលការរៀបចំផ្នែកសន្តិសុខជាមួយសហរដ្ឋអាមេរិក ដែលនឹងផ្តល់ជាសំខាន់នូវការគាំទ្រ សម្រាប់បញ្ហានេះ។ យើងកំពុងផ្តោតលើបញ្ហាទាំងនេះជាមួយប្រមុខការពារជាតិរបស់យើង ដែលកំពុងរៀបចំគម្រោងជាក់ស្តែងនៃប្រតិបត្តិការប្រភេទនេះ»។

លោកបានបន្ថែមថា «យើងកំពុងធ្វើឲ្យមានវឌ្ឍនភាពលើបញ្ហានេះ ហើយសង្ឃឹមថា យើងនឹងទទួលបានដំណោះស្រាយក្នុងពេលឆាប់ៗនេះ» ខណៈពេលដែលលោកព្រមានថា លោកមិនមានសុទិដ្ឋិនិយម ក្នុងការឈានដល់កិច្ចព្រមព្រៀងសន្តិភាព ឬបទឈប់បាញ់ រវាងអ៊ុយក្រែន និងរុស្ស៊ី នាពេលខាងមុខដ៏ខ្លីនេះឡើយ។

គួរបញ្ជាក់ថា លោក Stubb គឺជាមេដឹកនាំអឺរ៉ុបម្នាក់ ក្នុងចំណោមមេដឹកនាំអឺរ៉ុបមួយចំនួន ដែលធ្វើដំណើរទៅកាន់ទីក្រុងវ៉ាស៊ីនតោន កាលពីខែសីហា ដើម្បីចូលរួមកិច្ចប្រជុំរួមជាមួយប្រធានាធិបតីអាមេរិក លោក Donald Trump និងមេដឹកនាំអ៊ុយក្រែន លោក Volodymyr Zelenskiy ដើម្បីពិភាក្សាអំពីអនាគតនៃសន្តិភាព រវាងរុស្ស៊ី និងអ៊ុយក្រែន៕