ភ្នំពេញ ៖ លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ នាព្រឹកថ្ងៃទី២ ខែកញ្ញា ឆ្នាំ២០២៥នេះ បានដឹកនាំកិច្ចប្រជុំស្តីអំពី ការរៀបចំមហោស្រពភាពយន្តកម្ពុជា-អាស៊ីលើកទី៣ ឆ្នាំ២០២៥ ដែលកម្មវិធីនេះនឹងប្រព្រឹត្តទៅនាថ្ងៃទី០៦ ខែកញ្ញា ឆ្នាំ២០២៥ នាសាលាបុរីកោះពេជ្រ។

​លោក ប៉ុក បូរក្ស បានលើកឡើងថា កម្មវិធី “មហោស្រព ភាពយន្តកម្ពុជាអាស៊ី លើកទី៣” ដែលគ្រោងនឹងរៀបចំប្រារព្ធក្រោមកិច្ចសហការរវាងគណៈកម្មការរៀបចំមហោស្រពភាពយន្តកម្ពុជាអាសុី ជាមួយនឹងនាយកដ្ឋានសិល្បៈភាពយន្តនិងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ គឺ មិនត្រឹមតែជាសកម្មភាពនៃការជួបជុំផលិតករ សិល្បករ ក្នុងរង្វង់នៃឧស្សាកម្មភាពយន្តក្នុងតំបន់អាសុី ប៉ុណ្ណោះទេ ប៉ុន្តែក៏ជាការរួមចំណែកយ៉ាងសំខាន់បន្ថែមទៀត ក្នុងការពូនជ្រុំនូវ ចំណងមិត្តភាព និង ជាសក្ខីភាពនៃការបង្កើត ភាពជាដៃគូយូរអង្វែង ការគោរពគ្នាទៅវិញទៅ មកក្នុងចំណោម ប្រជាជាតិនានា ព្រមទាំងបានរួមចំណែកក្នុងការលើកកម្ពស់ កិច្ចសន្ទនាវប្បធម៌ និងបង្កើនទំនាក់ទំនងរវាងប្រជាជននិងប្រជាជនផងដែរ។ លើសពីនេះ ក្រៅពីការរៀបចំមហោស្រព គណៈកម្មការក៏នឹងរៀបចំកម្មវិធីវេទិកាឧស្សាហកម្មភាពយន្ត ដែលនឹងក្លាយជាកម្មវិធីដ៏សំខាន់ដើម្បីចែករំលែកចំណេះដឹងបទពិសោធក្នុងឧស្សាហកម្មភាពយន្ត ដោយមានការចូលរួមពីវាគ្មិនកិត្តិយសដែលមកពីបណ្ដាប្រទេសនានានៅក្នុងតំបន់អាស៊ី និងមានបទពិសោធច្រើនឆ្នាំនៅក្នុងឧស្សាហកម្មភាពយន្ត ។ វេទិកានេះនឹងផ្តល់ជាចំណេះដឹងបន្ថែម ព្រមទាំងបទពិសោធថ្មីជូនដល់អ្នកចូលរួមទាំងអស់។

សូមបញ្ជាក់ផងដែរថា យោងតាមរបាយការណ៍សង្ខេបនៃការរៀបចំមហោស្រពខាងលើនេះ ចាប់ពីបើកទទួលពាក្យចូលរួម នាដើមខែឧសភា ដល់ថ្ងៃទី២៥ ខែកក្កដា ឆ្នាំ២០២៥ គណៈកម្មការទទួលបានភាពយន្តខ្នាតវែងមកពីទូទាំងអាស៊ី ចូលរួមប្រកួតប្រជែងសរុប៦០ចំណងជើង និងភាពយន្តខ្នាតខ្លីចំនួន៩០ចំណងជើង ដោយក្នុងនោះមានភាពយន្តខ្នាតវែងកម្ពុជា ចំនួន២ និងខ្នាតខ្លីចំនួន១៧។ គណៈមេប្រយោគ សម្រាប់ពិនិត្យវាយតម្លៃភាពយន្តមានចំនួន ៤រូប មកពីប្រទេសចិន ឥណ្ឌា ម៉ាសេដូនេ និងកម្ពុជា នឹងធ្វើការជ្រើសរើសស្នាដៃភាពយន្ត និងម្ចាស់ជ័យលាភីដើម្បីទទួលពានរង្វាន់សរុបចំនួន ២១ពានរង្វាន់។ ជាមួយនេះ ស្នាដៃភាពយន្តដែលទទួលបានជ្រើសរើសនឹងត្រូវធ្វើការចាក់បញ្ចាំងនៅរោងភាពយន្ត Fable Cinema ចាប់ពីថ្ងៃទី៤ ដល់ថ្ងៃទី៨ ខែកញ្ញា ឆ្នាំ២០២៥៕

អត្ថបទ រដ្ឋា