ការរញ្ជួយដីថ្មីមួយទៀតកម្រិត៥,៥ រ៉ិចទ័របានអង្រួនភាគអាគ្នេយ៍អាហ្វហ្គានីស្ថានកាលពីថ្ងៃអង្គារសប្ដាហ៍នេះ ដោយបង្កឱ្យមានការភ័យខ្លាចនៃការខូចខាតនិងការបំផ្លិចបំផ្លាញបន្ថែមទៀតជិតពីរថ្ងៃបន្ទាប់ពីការរញ្ជួយដីដ៏ធំមួយក្នុងតំបន់ដូចគ្នាកម្រិត៦រ៉ិចទ័រ បានសម្លាប់មនុស្សជាង១.៤០០ នាក់និងរាប់ពាន់នាក់ទៀតរងរបួស។

កាលពីថ្ងៃអង្គារ ក្រុមតាលីបង់បានអំពាវនាវសុំជំនួយពីអន្តរជាតិ ខណៈក្រុមអ្នកជួយសង្គ្រោះបានព្រមានថា មនុស្សជាច្រើនអាចនៅតែជាប់នៅក្រោមគំនរបាក់បែក។

លោក Zabihullah Mujahid ប្រធានអ្នកនាំពាក្យរបស់រដ្ឋាភិបាលតាលីបង់បាននិយាយក្នុងការបង្ហោះលើបណ្ដាញសង្គម X ថា មនុស្សជាង៣.០០០នាក់ បានរងរបួសក្នុងគ្រោះរញ្ជួយដីកាលពីយប់ថ្ងៃអាទិត្យ ស្របពេលក្រុមមន្ត្រីបានព្រមានថាចំនួនជនរងគ្រោះទំនងជានឹងបន្តកើនឡើងខ្ពស់។

ក្រុមអ្នកជួយសង្គ្រោះកំពុងជម្នះការលំបាកចូលទៅកាន់តំបន់ដែលរងផលប៉ះពាល់មួយចំនួន បន្ទាប់ពីបំណាក់ដីបង្កឡើងដោយការរញ្ជួយដី បានបិទផ្លូវជាច្រើន។ ការខូចខាតគឺធ្ងន់ធ្ងរបំផុតនៅក្នុងខេត្ត Konar ជាតំបន់ដាច់ស្រយាល និងជនបទនៃប្រទេសអាហ្វហ្គានីស្ថាន ដែលក្រុមមន្ត្រីក្នុងតំបន់បាននិយាយថា ភូមិទាំងមូលត្រូវបានរាបដល់ដី។ មន្ត្រីអាហ្វហ្គានីស្ថានក៏បានរាយការណ៍ផងដែរអំពីជនរងគ្រោះនៅក្នុងខេត្ត Nangahar នៅជិតខាង ដែលជាចំណុចកណ្តាលនៃការរញ្ជួយដី និងខេត្ត Laghman ។

លោក Yousuf Hammad អ្នកនាំពាក្យអាជ្ញាធរជាតិគ្រប់គ្រងគ្រោះមហន្តរាយដែលគ្រប់គ្រងដោយក្រុមតាលីបង់បាននិយាយថា បណ្ដាអង្គការអន្តរជាតិបានដើរតួយ៉ាងសំខាន់ក្នុងអំឡុងពេលគ្រោះមហន្តរាយបែបនេះនាពេលកន្លងមក ។យើងពិតជាត្រូវការជំនួយមនុស្សធម៌អន្តរជាតិ៕