គណបក្សដ៏ធំបំផុតនៅក្នុងសភាប្រទេសថៃ បានប្រកាសនៅថ្ងៃពុធ (៣ កញ្ញា) នេះថា ខ្លួននឹងគាំទ្រគណបក្ស ភូមិចៃថៃ (Bhumjaithai) ដើម្បីបង្កើតរដ្ឋាភិបាលថ្មី ដោយជំរុញក្ដីរំពឹងដើម្បីបញ្ចប់ភាពជាប់គាំងនយោបាយជាច្រើនថ្ងៃ បន្ទាប់ពីការបណ្តេញនាយករដ្ឋមន្ត្រីចេញពីតំណែង។

ការសម្រេចចិត្តរបស់បក្សប្រជាជនថៃ ដែលជាបក្សប្រឆាំងដ៏សំខាន់ ក្នុងការគាំទ្របក្សភូមិចៃថៃ ជំនួសឱ្យបក្សភឿថៃ (Pheu Thai) ដែលកំពុងកាន់អំណាច អាចជាការផ្លាស់ប្តូរស្ថានការណ៍ដ៏ធំ ព្រោះបក្សប្រជាជនថៃមួយនេះ គ្រប់គ្រងជិតមួយភាគបីនៃអាសនៈសភាជាន់ទាប។

លោក ណាតាផុង រឿងប៉ាន់យ៉ាវុធ (Natthaphong Ruengpanyawut) មេដឹកនាំបក្សប្រជាជនថៃ បាននិយាយថា បក្សនេះបានសម្រេចគាំទ្រមេដឹកនាំភូមិចៃថៃ គឺលោក អានុទិន ឆានវីរគុល (Anutin Charnvirakul) ឱ្យធ្វើជានាយករដ្ឋមន្ត្រីថ្មី ដើម្បីទប់ស្កាត់មិនឱ្យមានរដ្ឋាភិបាលចម្រុះដែលមិនស័ក្ដិសមនឹងការគ្រប់គ្រងម្តងទៀត។

លោក ណាតាផុង បាននិយាយថា «មានហានិភ័យដែលថានឹងមានការវិលត្រឡប់នៃក្រុមចម្រុះចាស់មួយ ដែលបានបរាជ័យក្នុងការគ្រប់គ្រងប្រទេសក្នុងពេល ២ឆ្នាំចុងក្រោយនេះ និងហានិភ័យនៃការវិលត្រឡប់មកវិញនៃអ្នកធ្វើរដ្ឋប្រហារឡើងជានាយករដ្ឋមន្ត្រី» ដោយសំដៅលើលោក ប្រាយុទ្ធ ចាន់អូចា ជាឧត្តមសេនីយម្នាក់ដែលបានកាន់កាប់អំណាចក្នុងឆ្នាំ២០១៤ ហើយនៅតែមានសិទ្ធិក្លាយជានាយករដ្ឋមន្ត្រី បើទោះបីជាចូលនិវត្តន៍ហើយក៏ដោយ។

បក្សភឿថៃ ដែលកាលពីសប្តាហ៍មុនបានបាត់បង់នាយករដ្ឋមន្ត្រីរបស់ខ្លួនគឺលោកស្រី ផែថងថាន ស៊ីណាវ៉ាត់ (Paetongtarn Shinawatra) ក្រោមសេចក្តីសម្រេចរបស់តុលាការ បាននិយាយកាលពីថ្ងៃអង្គារថា ខ្លួនត្រៀមតតាំងជាមួយបក្សភូមិចៃថៃដែលជាគូប្រជែង ក្នុងការបោះឆ្នោតជ្រើសរើសនាយករដ្ឋមន្ត្រីថ្មី ប៉ុន្តែនៅថ្ងៃពុធនេះ បានចាត់វិធានការរំលាយសភាដើម្បីបើកផ្លូវឱ្យមានការបោះឆ្នោតថ្មី៕